KRALENDIJK — E barku ikoniko di Greenpeace, Rainbow Warrior, ta bishitá Boneiru fin di sèptèmber i habri su porta pa públiko. Bishitantenan por subi e famoso barku ambiental dianan 27 i 28 di sèptèmber. Inskripshon ta optenibel na e sitio na Waf Chiku Mercelina. Durante e dianan di porta habrí, bishitantenan lo risibí un rekorido di e barku, un símbolo di e movementu internashonal di medio ambiente. Guianan lo kompartí e historia di Rainbow Warrior, inkluyendo e bombardeo di 1985 i e hopi kampañanan ku Greenpeace a kondusí rònt mundu. E bishita ta koinsidí ku un paso hurídiko importante. Banda di e rekorido, tambe por haña sa mas tokante e demanda di klima ku residentenan di Boneiru, huntu ku Greenpeace, a presentá kontra Gobièrnu Hulandes. Djis un siman despues di e bishita di e barku, nan lo enfrentá e estado den Korte, un paso históriko den e lucha pa hustisia di klima. Segun Greenpeace, residentenan di Boneiru, Saba, i St. Eustatius, ta keda strukturalmente lubidá dor di Gobièrnu momentu ta trata di medidanan di klima. E organisashon ta argumentá ku tur hende na Hulanda, inkluso esnan riba e islanan, tin derecho riba protekshon di e krísis di klima. Un eksposishon na Waf Chiku Mercelina, ta enfoká riba hustisia di klima i kon islanan ta keda afektá desproporshonalmente pa kambio di klima. E bishita di Rainbow Warrior ta destiná pa mustra solidaridat ku e isleñonan, segun Greenpeace. Rainbow Warrior ta e barku insigniá di Greenpeace i a bin ta nabegá e oséanonan pa dékadanan, kampañando pa akshon ambiental i klima.