WILLEMSTAD — Ministerio di Desaroyo Ekonómiko, MEO i Qredits Kòrsou, den kolaborashon ku Federashon Kooperativanan Uní di Produkshon (FKUP), ta lansa un edishon nobo di Agri Business Academy. E programa di 11 siman ta kuminsá dia 22 di sèptèmber i ta tuma lugá dos biá pa siman. Durante e programa, empresarionan den sektor agrario lo risibí preparashon teorétiko i práktiko, entre otro den preparashon di un plan di negoshi i presentashon di nan konsepto empresarial. FKUP ta fasilitá e parti práktiko di e programa. Pa e edishon akí tin un kantidat limitá di lugá disponibel i partisipashon ta supsidiá pa MEO. Ku Agri Business Academy, MEO i Qredits ke fortalesé e konosementu i kapasidat empresarial nesesario pa desaroyá un negoshi sostenibel. Despues di e programa, empresarionan por bini na remarke pa apliká via Qredits Kòrsou pa un fiansa te 100.000 florin pa invershon den nan empresa. Personanan interesá den Agri Business Academy por tuma kontakto ku Qredits Kòrsou via 465-8282, òf www.curacao.qredits.com pa mas informashon tokante inskripshon. Minister Middelhof i Qredits ta reintrodusí Agrifonds na interes di 2% WILLEMSTAD — Roderick Middelhof, Minister di Desaroyo Ekonómiko i Raiska Herrera di Qredits Kòrsou, ta reintrodusí Agrifonds ku kasi 1,4 mion florin na fiansa disponibel pa empresarionan den sektor di agrikultura i peska. Danki na supsidio di Ministerio di Desaroyo Ekonómiko, empresarionan ku ta bini na remarke por fia via Qredits Kòrsou na un interes di solamente 2%, en bes di e interes regular di 9,95%. MEO ta pone un total di mas ku 403.000 florin na supsidio disponibel pa e inisiativa. Di e montante akí, mas ku 353.000 florin, ta destiná pa e supsidio di interes ku ta hasi posibel pa Qredits pone e kapital na fiansa disponibel pa empresarionan den sektor di agrikultura i peska. E otro 50.000 florin ta destiná pa Agri Business Academy, ku ta enfoká riba fortalesé konosementu i kapasidat empresarial den sektor agrario. E fiansa por yega te 100.000 florin pa empresario i por us’é pa invershon den entre otro ekipo, sistema di irigashon, infrastruktura, bestia, produkshon di kultivo i ekipo di peska. Empresarionan ku ta bini na remarke ta risibí tambe un periodo di seis luna sin amortisashon, durante kua nan ta paga solamente interes. “Ku Agrifonds nos ta hasi finansiamentu mas pagabel i aksesibel pa empresarionan lokal. Esaki ta duna nan mas espasio pa invertí den nan empresa, fortalesé produkshon alimentario lokal i kontribuí na seguridat alimentario di Kòrsou,” Minister di Desaroyo Ekonómiko, Roderick Middelhof, a indiká. Qredits Kòrsou ta fasilitá e fiansa i ta guia e empresario durante e proseso. “Na Qredits Kòrsou nos ta mira tur dia e pashon, perseveransia i talento den nos sektor di agrikultura i peska. Nos ta orguyoso di por kontribuí na hasi fiansa pa negoshi mas aksesibel pa nos empresarionan i asina aportá na fortalesementu di nos seguridat alimentario i ekonomia,” Raiska Herrera, Branch Manager di Qredits Kòrsou, a deklará. E kolaborashon ta sigui riba un trayekto anterior entre MEO i Qredits. Na 2024, Qredits Kòrsou a otorgá mas ku 400.000 florin na fiansa na empresarionan den sektor agrario.