Muchanan ta aktua den nan propio pelíkula

KRALENDIJK —Muchanan di skol básiko De Pelikaan, Kolegio Papa Cornes, Kolegio Strea Briante i Stichting Professionele Kinderopvang Bonaire, a kuminsá traha ku Festival di Sine di Derecho di Mucha di UNICEF. Den e proyekto karibense grandi akí di sine pa mucha, muchanan ta pensa í traha un pelíkula tokante un derecho di mucha ku nan ta haña importante. Tur seis isla hulandes karibense ta partisipá.

E último simannan e muchanan a haña lès tokante nan derechonan i a traha un pintura di esei. Durante un elekshon yen di suspenso di e skol, a skohe e pintura di mas bunita. E pintura akí ta forma e storia di e pelíkula. E muchanan mes ta skirbi e storia i nan mes ta aktua den nan propio pelíkula profeshonal.

Ku Festival di Sine di Derecho di Mucha di UNICEF, UNICEF Hulanda ke siña muchanan tokante nan derechonan na un manera interaktivo i kreativo. Na Boneiru UNICEF Hulanda ta traha huntu ku Bonaire Youth Outreach Foundation i Link-ERS Projectmanagement.

Jeremy di skol básiko de Pelikaan: “Mi ta haña e kos aki hopi bon, pero e filmashon tambe ta un tiki emoshonante.”

Sterre tambe di skol básiko de Pelikaan ta konta ku smak: “Mi ta siña hopi di e festival di sine akí. Mi a siña ku ta importante pa mucha tin derecho í ku ta importante pa trata mucha bon.”

Final grandi
E programa no solamente ta edukativo i dirigí riba empoderamentu di hubentut boneriano, sino konosé tambe un elemento kompetitivo. Durante e estreno festivo, ta skohe e sine ganadó di Boneiru. Trahadónan di e sine ganadó ta representá Boneiru durante un regional yen di suspenso na Kòrsou. E otro sinku islanan hulandes karibense tambe ta presente na e final akí.

Hanneke Braams, ku ta traha na Link-ERS Projectmanagement i kordinadó di proyekto lokal di e programa: “Festival di Sine di Derecho di Mucha di UNICEF ta stimulá muchanan na Boneiru pa pensa tokante derecho di mucha. Pero no ta keda na esei so, e muchanan aktivamente ta bai traha huntu na esaki. Ya kaba nos no por warda e gran dia di estreno yega pa kaba den kua tur skol partisipante por bai atmirá pelíkula di otro!”.

Dia 22 di mart ta estrená e pelíkulanan festivamente i e muchanan pa promé bia ta bai mira nan pelíkula.

Festival di Sine di Derecho di Mucha ta parti di un programa mas amplio di derecho di mucha di UNICEF Hulanda, Entidat Pú- bliko Boneiru i Ministerio di Interior i Relashon ku Reino ku meta pa sostené profeshonalnan, mayornan i muchanan pa huntu sigui mehorá e situashon di derecho di mucha den e parti karibense di Reino.

Propio derecho
Tur mucha, unda ku ta na mundu, tin mes derecho. A stipulá e derechonan di mucha akí den Tratado enkuanto Derecho di Mucha. Riba enkargo di Nashonnan Uní, UNICEF ta pèrkurá ku gobièrnunan ta respetá i kumpli ku Tratado di Derecho di Mucha. Tambe den Reino Hulandes ta vigilá si gobièrnu ta kumpli ku e palabrashonnan den Tratado di Derecho di Mucha. Muchanan na Hulanda Oropeo i Karibense tin mes derecho. Tòg ta kumpli di manera diferente ku e derechonan di mucha i esei mester ta otro.For di 2016 UNICEF Hulanda ta traha huntu ku Ministerio di Interior i Relashon ku Reino i e Entidatnan Públiko di Boneiru, Sint Eustatius i Saba, pa sigui mehorá e situashon di derecho di mucha. Esaki UNICEF Hulanda ta hasi huntu ku partnernan na Hulanda Karibense i Oropeo. Asina UNICEF Hulanda ta duna edukashon di derecho di mucha i ta organisá diálogo rònt di e tema edukashon.

Tambe UNICEF Hulanda ta traha huntu ku Missing Chapter Foundation den e inisiativa Konseho di Mucha. Ku Konseho di Mucha, muchanan na Hulanda Karibense ta haña un bos den desishon ku tin influensia tambe riba nan futuro.

SHARE


LEAVE A REPLY

Please enter your comment!
Please enter your name here