KRALENDIJK — Despues di 63 aña e promé klas di Maria Gorettischool a reuní den kurá di e edifisio ku durante sigur 7 aña asina a fungi komo un asina yamá ‘bewaarschool’. E edifisio aki, situá na Antriol, awendia ta residensia di Bòi Antoin, kende a duna tur koperashon pa e enkuentro interesante aki por a tuma lugá. E inisiativa pa e grupo a bini huntu tabata di Chon Theodora. E tambe tabata den e grupo di mucha ku na sèptèmber 1955 a forma e promé klas di Maria Gorettischool. E inisiativa aki a bini na momentu ku el a topa ku Petra Mercelina, ku tambe tabata den e promé klas di e skol, ku awendia lo a kai den e kategoria di skol preparatorio.
Chon Theodora a kuminsá ku un búskeda pa e personanan ku huntu kuné na 1955 a sinta den klas na Maria Gorettischool. El a logra haña hopi di nan. Tambe el a trese na e enkuentro aki un di e ‘kleuterleidster’-nan na e skol, esta Yùfrou Duchi Theodora-Christiaan. Otro personanan ku a traha na e skol aki, operá pa Sùrnan di Roosendaal, tabata Yùfrou Du Dortalina i Olivia Marchena. Tin otronan ku tambe a yega di remplasá e ‘kleuterleidster’-nan fast.
E enkuentro resien tabata hopi ameno. E grupo a kombersá durante kasi tres ora den kurá di Maria Gorettischool. A probechá di nan presensia pa hasi entrevista ku e eksalumnonan di e skol, loke a produsí sufisiente material pa dos programa di televishon Herensia. Bòi Antoin a splika ku el a komprondé di su rumannan mas grandi ku su mayornan a traha e edifisio aki originalmente komo tienda. Despues sinembargo el a traha un edifisio mas chikitu den mesun kurá pa tienda i el a disidí di hür esaki ku e kongregashon di Sùrnan di Roosendaal, ku tabatin un ‘bewaarschool’ na Playa.
Sofia (Duchi) TheodoraChristiaan, ‘kleuterleidster’ na Maria Gorettischool na 1955 bini ariba, a añadí: “Pastor Nooyen tabata na parokia di Coromoto e tempu ei. E muchanan di Antriol ku yega edat di bai ‘bewaarschool’ tabata para dilanti misa di Coromoto pa warda riba konvoi pa bai e ‘bewaarschool’ di Playa. E tabatin duele di e muchanan i a proponé pa habri un ‘bewaarschool’ den su parokia. Asina e skol aki a bira realidat.”
Bòi Antoin: “Mi ta kalkulá ku e skol aki a dura masoménos seis pa shete aña. Despues mi mayornan a remodelá e edifisio aki den un bibienda den kua hopi hende konosí a biba. Entre otro Edmundo Confesor, Sylvester Paul, Aubrey Sealy, Nechi Wijman ku su famia, Felix Nicolaas i su famia, Arthur Hart i su famia, mi ruman Erika Antoin i awor mi mes.”
E enkuentro di eksalumnonan di Maria Gorettischool tabata hopi ameno i plasentero. Chon Theodora i su esposa Norma a sòru pa ko’i bebe i kome. Fundashon Históriko Kultural Boneriano (FuHiKuBo) tambe a duna su aporte pa hasi e dia bira realidat.
