KRALENDIJK — Fin di siman tras di lomba Fittipaldi Pietersz a regresá for di Valdosta, estado Georgia, na unda el a kompetí den e ’37th Annual Exoticycle Spring Cup’. Esaki ta e mesun pista di drag na unda Fittipaldi aña pasa a keda na di 2 lugá.
Tur kos a kana bon pa loke ta práktika i klasifikashon. E promé dia di kareda pa, motibu di áwaseru, a kanselá. Edson (Fittipaldi) Pietersz:
“Mas dia di kareda den mi kaso, ta mihó p’ami. Di e forma ei mi ta kore mas i kustumbrá mas ku e motosaikel, loke ta yudami bira mas stabil pa kareda. Esaki no ta un èksküs, pasobra mi sa ku mi kontrinkantenan ta mihó prepará ku ami.”
Djadumingu 8 di aprel e karedanan a tuma lugá i e bia aki Fittipaldi a logra solamente di 4 lugá den 1 kategoria. “E práktika tabata bon i mi tabata stabil pa e karedanan fin di siman. Simplemente durante kareda mi a kometé algun eror pa kua mi tabatin atenshon èkstra durante práktika, esta e parti di reakshon na lus.
Esaki ta loke a kostami di no a yega final den 1 di e 2 kategorianan den kua mi a pusta.” Di akuerdo ku Pietersz, e siguiente bes e tin tarea pa praktiká den sierto área, pa e ta mas stabil. “E bon ta ku e motosaikel Suzuki Hayabusa, ta bon kompará ku e otro motosaikel, loke ta dunami oportunidat pa mi perfekshoná riba detayenan di kareda. Pues mi ta bai hasi tur posibel pa siguiente kareda duna bon kompetensia pa mihó resultado.”
Fittipaldi Pietersz ta yama un danki na NAPA Auto Parts, tambe R&L Exporting, pa nan koperashon ku a hasi posibel su partisipashon na e kareda na Valdosta, Georgia, Estádos Unídos
