SGB a selebrá huntu ku alumno i dosente

KRALENDIJK – MBO i VMBO di Komunidat di Skol Boneriano, SGB, a yega nivel básiko di enseñansa meskos ku Hulanda. Esaki no a pasa sin selebrashon mustrando kon kontentu nan ta ku e logro aki. Djabièrnè mainta hefe di OC&W, Nolly Oleana, huntu ku Frans van Efferink, direktor di SGB, tambe dosentenan i alumnonan, a tuma parti na un selebrashon pa e okashon aki. Oleana a papia den presensia di tur presente i a splika kon a inisiá ku MBO i kon e situashon ta awor. Na 2011 mester a reorganisá MBO esaki despues ku Boneiru a bira parti di Hulanda na 10 di òktober 2010.

Oleana a bisa el a papia ku van Efferink na Sint Eustatius, e tempu ei e no tabatin niun plan pa bin Boneiru. A papia riba diferente tópiko tokante e situashon di SGB e tempu ei. Awor MBO a logra mas ku e nivel ku e mester tin pa e ta un skol ku bon nivel, esta meskos ku skolnan na Hulanda. E trabou grandi a sosodé serka e dosentenan. Nan a pone ku awor nos ta riba e bon kaminda. Tur kos ta sosodé den klas, apesar ku pafó tambe tabatin hopi trabou pa por a logra drecha e nivel di lèsnan tambe e maneho di e skol. Awe nos ke selebrá huntu, Oleana a menshoná durante su spich na e skol.

Oleana a sigui bisa, nos a prepará bolo i shampaña pa e okashon aki. E nivel tei i awor nos ta bai pa ekselensia. Tur mucha ku drenta aki tin derecho pa haña bon edukashon. No ta fásil pa yega e nivel haltu tur bia. Si logra un nivel manera ta e kaso awor, tin trabou grandi pa manten’é. El a traha hopi aña na SGB i ta orguyoso di e skol i esnan ku ta traha aki. Seguidamente van Efferink a papia i a menshoná ku Liset de Keijzer no por ta presente pasobra e ta den eksterior.

E ta haña ‘kippenvel’ ku a logra esaki i sigur ta un stap grandi. Tin espasio pa mehorashon, sinembargo ta bai hopi bon i ta momentu pa selebrá. Despues a kontinuá ku selebrashon pa tur ku tabata presente manera por mira riba potrètnan. Un alegria total.

SHARE


LEAVE A REPLY

Please enter your comment!
Please enter your name here