Un kustumber ku no por bai pèrdí

KRALENDIJK — Djasabra mainta tabatin basta moveshon riba Waf Chico Mercelina di hendenan ku a bai piska. Piskánan tabata kome bon. Buní, yag i asta gristèlchi di laman afó, tambe otro piská nan tabata pone riba waf. Ta un di e kustumbernan di tempu bieu na Boneiru, pero ku a disparsé hopi. Un di e motibunan ta e restrikshonnan ku tin pa piska na waf pa algun aña kaba. Djasabra no tabatin ningun barku mará na Waf Chico Mercelina, di manera ku piskadónan di waf por a piska na nan antoho. I piská tabata kome bon djasabra mainta.

No masbangu, ku ta un tipo di piská ku sa hala hopi hende trese waf ora ku nan ta pasa, sino e bia aki tabata buní, yag i gristèlchi di laman afó. E tiki ratu ku un fotó- grafo di Extra a pasa na Waf Chico Mercelina e por a mira kuantu piská nan tabata pega. Spesialmente gristèlchi di laman afó ta un piská hopi dushi. Buní tambe awendia a bira un piská hopi pidí, kontrario na ántes ku bonerianonan no tabata gusta kome buní i ku preis di e tipo di piská aki tabata hopi abou.

Naturalmente mester tin regla pa mantené siguridat den haf, pero na momentu ku no tin barku ta bon pa demonstrá fleksibilidat i laga hendenan sigui piská riba waf. Ta un kustumber ku no por bai pèrdí.

SHARE


LEAVE A REPLY

Please enter your comment!
Please enter your name here