Wèwè Sint Jago ganadó Kanto Krioyo

KRALENDIJK — Wesley (Wèwè) Sint Jago a bira ganadó di Festival Kanto Krioyo, un aktividat ku ta bin bèk tur aña algun siman promé ku selebrá ‘Dia di Rincon.’ Charlisse Thomas su partisipashon tambe a hala atenshon, komo ku el a gana dos título, esta komo kantante mas popular i segundo finalista di e festival. Djasabra anochi den stadion Antonio Trenidad na Rincon, komishon Kanto Kansion Krioyo a tene un Festival Kanto Krioyo 2018. E festival e aña aki tabata dediká na Elvin Anthony, mihó konosí komo His’é But’é.

E festival a ranka sali un ora lat ku introdukshon di e kantantenan i kanto di himno di Boneiru i Rincon. Diesocho kantante a partisipá kompañá pa shete agrupashon musikal. Stadion tabatin hopi hende ku a bin animá nan kantante faborito. Tabata un anochi basta largu kargá ku músika, ambiente na unda kompositornan a demostrá nan kreatividat i talento. Despues ku tur e diesocho kantantenan ku a presentá, masoménos 1:25 di mardugá, kuerpo di hurado a retirá pa konta punto.

Despues di basta deliberashon, tres kuart di ora mas lat a anunsiá e resultado final. Kantante mas popular a bira Charlisse Thomas; terser finalista Isabelle Mercera; segundo finalista Charlisse Thomas; promé finalista Tiri Trinidad; mihó kompositor Djòni Leoneta; ganadó Wesley (Wèwè) Sint Jago.

 

SHARE


LEAVE A REPLY

Please enter your comment!
Please enter your name here