Fittipaldi Pietersz será 24 ora

KRALENDIJK

Djasabra último Fittipaldi Pietersz di Extra tabata detené pa 24 ora, esaki pa kontribuí ku entre otro informashon di seguridat di e prison nobo na Plantashi Aruba. ‘Proefboef’ tabata e nòmber ku e aktividat tabatin. Fittipaldi a konta su eksperensia loke a sosodé, manera un detenido di bèrdat.

Yegada

Djasabra atardi mi a yega na prison nobo na Plantashi Aruba i a pasa diferente sekshon di kòntròl, promé ku a yega na e kamber, loke nos ta yama sèl. Entre otro a pasa un kamber unda mester a kita sunú, sinembargo a ekskluí ku e grupo di ‘proefboef’ mester a hasi esaki. Den kamber tabatin microwave, eiskast, kos pa keinta awa, flat screen, stul, mesa i kashi pa warda entre otro paña. Nan a trese kuminda i pan pa kome promé ku drumi. Normal lo ta pan solaCentro Pizza Adonai ta buska 2 kòki *mester tin 2 pa 3 aña di eksperensia *mester tin karta di garantia/propio transporte Pa mas informashon yama 717-4751 mente pa atardi i jogger. Debí ku nos a drenta prison atardi, mi ta kere tabata un eksepshon i nos a haña kuminda, balchi karni ku batata machiká.

Fasilidat

Normal ta sera tur detenido 5’or di atardi den sèl i nan ta keda sera te mainta kuartu pasá di ocho. Den nos kaso nos a yega sèl algu promé ku och’or i nan a laga nos te kuartu pasá di nuebe liber. Asina tur hende a bai den nan sèl, sierto hende 2 den sèl i algun solamente 1 persona. Danki Dios ami tabata mi so den sèl apesar ku tabatin 2 kama. E kama ta bon kasi mes suave ku esun na kas, esta e kolchon. Un fèn na kabes di kama, paña di kama pa bo mes drecha, sinembargo e kamber ta un situashon humano. Mi a sende televishon, un kantidat di kanal ku bo no sa kua pa wak. Mas o ménos 12’or mi a disidí di paga televishon pa drumi. Aki mi a sinti poko falta di kas. A reina un silensio i solamente tabata skucha bientu fuerte ku tabata supla na e muraya parti pariba di e kamber di prison. Mi a bai para na e tralinan i solamente mi tabata wak un parti di Antriol i tambe algun kas na Lagun Hill, esta e lus di e kasnan. Un silensio ku momentu ku bo mester keda pa largu tempu den prison, esaki sigur ta toka bo kurason. Ami a keda relativamente trankil pa motibu ku mi sa ku ta solamente 24 ora. Subi kama i a tuma poko tempu pa mi a pega soño te mainta. Den e kamber tin un boton unda por primi i komuniká ku e wardadó di presu.

Desayuno

Mi a drumi bon i spièrta 6’or mas o ménos. Mi a wak pelíkula na televishon, tambe kareda di outo i un parti di misa. Pa 8’or en punto nan a trese pan ku salada di tuna i jogger. Otro kos anochi i mainta bo ta tende e dash di InselAir zona pasa nèt riba prison. No ta skucha nada mas, loke ta kontrali na loke un presu ta tende awor den sentro di suidat, esta zonido di outo, motosaikel i músika, asta gritu di un konosí. Kuartu pasá di ocho nan ta bisa bo ta bai ‘lucht’, loke ta sosodé den un área di 30 pa 30 meter. Muraya so bo ta mira, nada otro. Aki bo por kana rònt i kombersá ku otro detenido. Kuartu pa nuebe wardadó di presu ta bin puntra ken ta bai lès i esun ku no ta bai ta bai den sèl i keda será. Kada bes ku bai pafó di bo área di kamber, mester listra tur hende. Asina nos a bai diferente sekshon, di lès i deporte durante e dia te atardi.

Separá

Durante ku kada grupo sali for di nan área pa bai hasi entre otro deporte, no por topa ku niun otro grupo di presu. Kada grupo ta keda separá. Tampoko tin bista i sigur no kontakto ku e hende muhé. Tabatin un momentu, pa un òf otro motibu nos grupo a topa un grupo di hende muhé i aki un bochincha di otro mundu a reina. Sinembargo wardadó di presu mester a aktua rápido, pa alehá e dos gruponan.

Almuerso

Mèrdia 12’or en punto kuminda ta yega den bo kamber. Un aros bruá riku na galiña ku webu riba dje i berdura tambe un pida bolo di pampuna. Un kuminda ku aki afó lo kosta 12 dòler i ami sigur no por kome tur e kuminda den un bia. E ta hopi. Esaki ta básikamente loke a sosodé durante e 24 ora den prison nobo. Mi no a sinti nada, laga bisa komo preshon di ta den prison. Mentalmente bo ta trankil, pa motibu ku bo sa ku ta simplemente un práktika. Fastioso lo ta si bo ta será pa tempu largu. E sentimentu na e momentu ei ta otro si mester keda hopi aña djis pa menshoná.

Hotèl

Den prison bo tin diferente kos, loke hopi no tin pafó na nan kas. E ta kasimente un kamber di hotèl ku tur kos den dje. Esei no tin duda. Un kos bo no tin i keré mi, esaki ta pisa hopi, esta libertat. Prison por ta parse di 5 strea, sinembargo tin regla loke pafó di prison bo no mester tene bo mes na dje i bo por bai tur kaminda momentu ku bo ke. Mi mensahe ta, esaki tabata djis un eksperensia den mi bida kon hende ta pasa será. Dios a duna nan un bida, bib’é bon. Kada dia tin un balor inmenso. Hopi bes nos no ta realisá, te ora bo hañá bo den un situashon, den e kaso aki den prison, bo ta ripará kiko bo a pèrdè. Bèrdat tin momentu ta presentá i kisas ta difísil pa evitá, sinembargo keda konsentrá riba libertat di bida. Prison no ta pa tur hende. E ta pa esnan ku kometé algu inkorekto. No ta tur hende ta bai prison. Morto ta pa tur hende. Pensa promé bo hasi algu ku bo sa ku ta bai kostá bo libertat.

SHARE


LEAVE A REPLY

Please enter your comment!
Please enter your name here