KRALENDIJK — SV Juventus Kids a risibí spònser di WEB NV, Fundashon Wega di Number Boneinu i KuerpoPolicial. Den preparashon pa e biahe pa Aruba, SV Juventus Kids a tene diferente aktividat pa asina hasi e biahe aki posibel ku 4 ekipo. Dia 18 mei 40 mucha ta biaha pa Aruba pa asina partisipá na un torneo di futbòl na vèlt di Britannia dia 19 mei, unda nan ta bai topa vários ekipo di Aruba den nan Kategoria. SV Juventus Kids ta masha agradesido na su spònsernan i na mayornan ku a koperá pa asina hasi e biahe aki posibel. Komo ku ainda no a kompletá e sèn kompleto pa e biahe aki, Komishon di Mayor di SV Juventus Kids a organisá un último evento pa rekoudá e fondonan ku falta. Un ‘Back to the 80’s, early 90’s’, e bia aki pa adulto na Islander dia 11 mei. E organisashon ta spera ku e último evento aki lo generá e fundonan ku falta pa asina hasi e biahe aki unu eksitoso pa e muchanan. Mas informashon tokante SV Juventus Kids riba página di Facebook SV Juventus Kids Bonaire, òf si tin pregunta por email na Juventuskidsbonaire@gmail.com.
