KRALENDIJK —

Djadumingu 17 di yüni 2018 ‘Algemene Spaar- en Kredietcoöperatie’ (ACU) a tene nan informashon di reunion anual di sosionan na Habitat. Despues di e reunion a sigui un ‘happy hour’, unda sosionan por a kòmbersá ku dirigentenan di e koperativa ACU. E reunion tabata basá riba diferente punto hopi importante. E atardi tabata guiá pa e presidente di direktiva di ACU Angelo Davelaar. E reunion a toka e tema general di e koperativa, sinembargo espesialmente asuntunan relashoná direktamente ku Boneiru. Davelaar a duna un sinópsis di e reunion general ku a tuma lugá na Kòrsou, respektivamente 27 di mei i 10 di yüni último. Tambe a elaborá riba diferente moshon, formashon di komishon di restrukturashon, tambe elekshon pa órganonan statutario. Gerensia di ACU a elaborá ekstenso riba sifranan anual i sifranan partikular di Boneiru. Seguidamente sosionan a hasi pregunta krítiko tokante e sifranan presentá. Konseho di Supervishon, den persona di Cresel Cijntje, a presentá nan relato anual, unda el a kontestá pregunta ku sosionan a dirigí na su persona. Frank Pines a presentá e relato di Komishon di Krédito i a kontestá tur pregunta ku a bini tokante nan relato. Davelaar tambe a trata relato di direktiva i a kontestá tur pregunta. Den turno liber sosionan a hasi pregunta mas general, tambe algun personal. Momentu di ‘happy hour’ a kuminsá ainda sosionan a sigui hasi pregunta. Davelaar tabata mas ku satisfecho pa e asistensia di sosionan i e interes den nan koperativa. Na mes momentu el a gradisí tur pa e konfiansa den ACU.