KRALENDIJK —
Djarason 13 di yüni tabata e dia nashonal di lesa pa mucha. Esaki ta di dos aña ku Fundashon Lesa i Skirbi Boneiru ta organisá e dia aki. E aña aki atrobe e tabata un dia eksitoso. Tur e boluntarionan, alumnonan, skolnan i krèshnan, ku a papia kuné durante i na final di e dia, tabata hopi entusiasmá. Kasi tur e boluntarionan ya kaba a partisipá ku nan kier lesa otro aña atrobe. Tambe tin algun di e boluntarionan ku lo kier lesa regularmente na skol òf krèsh. E boluntarionan a lesa den kasi 100 grupo di skolnan básiko i krèshnan. En total 110 hende a pone nan mes disponibel pa lesa. Hopi kompania a partisipá, por ehèmpel WEB, MCB, STINAPA, FORMA, RCN, Cargill, Sentro pa Hubentut i Famia, Van Eps Kunneman, pero tambe tabatin hende di polis i gezaghebber interino Curvin George, kende a lesa pa e muchanan. Por bisa ku e aña aki atrobe henter Boneiru a partisipá na e dia nashonal di lesa pa mucha. Fundashon Lesa i Skirbi Boneiru kier a gradisí tur boluntario, kompania, skol i krèsh, pa a partisipá na e dia nashonal di Lesa aki. Danki na nan ku e dia aki a bira un dia eksitoso. Fundashon Lesa i Skirbi Boneiru ta spera ku e dia nashonal di lesa aki a stimulá hopi mayor, maestro i yùfrou di krèsh, pa lesa regularmente pa nan muchanan. Otro aña atrobe tin e dia nashonal di lesa pa mucha. E fecha no ta konosí ainda, pero ta partisipá esaki mas pronto posibel. Fundashon Lesa i Skirbi Boneiru ke a yama un danki spesial na WEB, MCB i Cargill, ku a spònser e dia aki. Sin nan ayudo finansiero e proyekto aki no tabata posibel.
