KRALENDIJK –
Museo Terramar ta situá den sentro di Playa. Ta trata di un museo unda no solamente tin informashon di Boneiru, sino tambe di otro islanan den besindario. Jude Finies huntu ku Marjan Wolters, direktor interino di e museo, a splika e motibu di eksistensia di e lugá pa Boneiru. E meta ta pa laga mas hende lokal sa di museo i tur loke tin pa ofresé. Esaki ta enserá kon Boneiru a bira konosí i ken ta esnan ku a yega Boneiru komo e promé hendenan. Esaki ta djis pa duna un idea kiko por ferwagt na Museo Terramar. Por haña un bista for di pasado pa awor pa medio di potrèt, pintura, diferente artefakto i tambe skucha splikashon tambe. Ta importante pa e boneriano sa kon e isla aki a desaroyá di pasado te awendia. Spesialmente pa muchanan ta importante pa nan haña un bista kon e boneriano a desaroyá atraves di tempu. Tur esaki nan por mira pa medio di pintura, tambe sierto kosnan trahá, ku ta laga mira kon e kos tabata den pasado. Ta importante pa e museo ta konektá ku e hende lokal. Durante dia tur hende por bishitá e lugá, situá unda ántes tabata kas di músika, patras di e sentro komersial di Toon Abraham. Tin programa spesial pa mucha ku ta indiká i splika tur kos, un forma pa e mucha komprondé fásil i atraktivo. Tin posibilidat pa mishi ku sierto kos di ántes, asina eksperensiá e material original. Por haña informashon tambe pa medio di ret sosial, manera; Facebook, Twitter, Instagram. “Ta posibel pa forma grupo, sea ku skol, famia òf otronan, i bishitá e museo. Hopi turista ta bishitá e museo, loke ta importante, sinembargo mas importante ta pa esnan lokal bini serka nos”, Marjan Wolters a splika. A informá Extra ku durante luna di ougùstùs ta planiá pa organisá un dia habri, unda tur hende por pasa na e museo. Sinembargo tur dia Museo Terramar ta habri for di 9’or di mainta te 6’or di atardi. Por yama pa reservashon na number di telefon; 7170423.
