KRALENDIJK —
Djadumingu mainta ‘The Messengers of the Lord’ i ‘The Shekinah Dancers’, tabata di bishita na Kas di Kuido Fundashon Mariadal. Tabata un mainta hopi emoshoná, sinembargo bendishoná. E dos gruponan ta forma parti di ‘Zondagschool’ di Iglesia Baranka di Restorashon, bou di guia di e pastor Ramiro i Tamara Richards. E gruponan ta presentá mas bia na eventonan den iglesia mes, sinembargo en konekshon ku e vishon di e aña aki ku ta bisa ‘Krese dor di bo palabra i biba pa medio di fe’, e gruponan a sali bai deleitá e grandinan loke nan ta hasi. Esaki pa medio di kanta, baila i trese e palabra di Dios riba nan nivel. Na e okashon aki ‘The Messengers of the Lord’ i ‘The Shekinah Dancers’, a deleitá tur presente na Kas di Kuido ku nan repertorio di kantika i baile. Por bisa ku e mainta tabata unu ameno, unda nos grandinan a gosa di tantu e kansionnan, komo e baile. Komo sorpresa tabatin elekshon di Reina i Rei di Kas di Kuido. Reina a resultá Hilda Saleh i Rei a bira Eric Beeldsnijder. E rei i e reina a risibí korona, tambe makutu ku komestibel Na final e grandinan, tambe esnan ku tabata di bishita, a laga sa ku pronto tin ku regresá. Tur mucha a bai di akuerdo i asta nan ke a bai dibertí ku e grandinan regularmente. E dos lidernan di e gruponan, Tante Cynthia Sno i Tante Mariella Capella, ta gradisí e dos lidernan di aktividat sra. Rocío i Charlotte i nan tim tremendo ku a duna un man pa hasi e mainta posibel. E dos gruponan ta deseá pueblo di Boneiru en general i spesialmente nos grandinan, un dia bendishoná yen di alegria, pas, felisidat i e amor di Dios.
