KRALENDIJK – Komunidat di Skol Boneriano, SGB, Sekshon MBO, tabatin un tremendo aktividat. Djamars último grupo HZW 2.1 a presentá un programa ku nan a organisá spesialmente pa hendenan di edat. E aktividat a karga e nò- mber ‘De rode neus dag MBO’. E hóbennan ta studia den e direkshon aki, esta kon pa atendé ku hende di edat i tabata un bon momentu pa nan a praktiká e realidat ku e grandinan presente den kurá di e skol. Esaki yùfrounan a opservá tambe, esta kon tur kos a kana e atardi i e grupo a haña punto, ku ta konta pa nan klas. Despues di a inisiá e programa ku himno, direktor di e unidat, Liset de Keijzer, a papia i a splika ku e hóbennan mes a prepará tur kos pa e atardi. Seguidamente a sigui ku diferente kantika kantá pa studiantenan pa e grandinan ku tabata disfrutá bou di tènt. Juni Piar di Best Care a papia i a menshoná ku nos grandinan ta ehèmpel pa nos tur. Hende por siña traha ku grandi, sinembargo ta un trabou ku ta rekerí atenshon for di e kurason di e hende. Tambe a papia e atardi yùfrou Susi i zùster Henna, kendenan a elaborá tokante abusu di hende grandi. Despues a kontinuá ku komedia yamá Bieu ta kaminda. Den e komedia a ilustrá kiko tur Best Care ta nifiká i tin pa ofresé. Esaki a sosodé den un tremendo show, unda tur presente a hari nan barika yen. E atardi a sigui ku diferente sekshon promé ku e final. Komentarionan tabata ku e hóbennan di grupo HZW 2.1 a prepará un tremendo presentashon.
