KRALENDIJK —
Djamars atardi despues ku durante henter dia tabatin wèlga na Kooyman Mega Store, Gerald Bernabela presidente di FEDEBON, sindikato ku ta representá e trahadónan, tabata fuerte. Aki el a dirigí palabra na prensa i a mustra ku nan no ta aseptá e mal aktitut di gerensia di Kooyman Mega Store. Nan ke yama polis pa bin kita nos for di dilanti e tienda, awèl laga nan purba, nos ta sinta warda polis yega, Bernabela a bisa. Bernabela a sigui bisa, Kooyman tin nos fadá i ta keda manda nos di kashi pa muraya. Simplemente nan ta hasi tur posibel pa no negoshá nada na drechi pa e trahadónan. Hopi dia ta papia i gerente di Kooyman ta bira pa atendé e asuntu na serio. Awe djamars a pidi pa un reunion i Kooyman ta insistí ku nan lo no oumentá salario di trahadónan. Nos ta eksigí entre otro pa e unifòrm ta kompletu, no un parti so. Ta un abuso pa e trahadónan ku ta gana un miserabel 4 pa 5 dòler pa ora. Kooyman Mega Store ta gana hopi sèn i ta paga trahadó hopi abou. Awe nos tabatin un kompromiso i kos a pega. Kooyman ta hunga wega i tur trahadó i nos ta fadá di e asuntu aki. Na Kòrsou i Aruba e kos ta kompletamente otro. Solamente na Boneiru e kos di sokete aki ta sosodé. A traha Mega Store i menshoná yen palabra bunita i ta paga empleado kos di sokete. No por bisa otro, simplemente ta kos di sin bèrgwensa, Bernabela a bisa. Bernabela a sigui bisa, awor ke bai Korte ku sindikato, ta menasá ku ta bai yama polis. Un abogado a bin papia yen di kos sin pia sin kabes anto ku hopi mal manera no ta ni kumindá hende. Nos no ta kachó i mester tin rèspèt pa nos i komo un abogado mester sa e kos aki mihó. El a referí na abogado Marga van Lieshout. Bernabela hopi furioso a bisa: ‘Gobernantenan ta sinta man krusá i no ta hasi nada. Esaki ta nifiká ku Kooyman lo yama Uitzendbureau pa pone otro hende traha i kore ku e otronan for di trabou. Awèl e kos aki lo kaba na malu. Nos lo mira’.
