KRALENDIJK —
No falta masha mas pa e kompania Artes Piedra B.V. inisiá ku produkshon di klenku na Bo-neiru. E personanan tras di e fábrika aki pa produsí klenku ta Angelo Guiseppe Clarinda i su señora Judeline Emerenciana, kende ta direktor komersial di Artes Piedra B.V. Ya kaba e promé klenkunan, den forma di prueba, a sali fo’i e instalashonnan di Artes Piedra. Angelo Clarinda, empresario boneriano ku a move hopi den eksterior, entre otro último tempu aki na Cuba, a konta di e proyekto aki ku a bira realidat den un lots situá na Kaya Amsterdam. E ta spesialisá den trabou di betòn. Clarinda: “Tur kos ta práktikamente kla pa por inisiá ku trahamentu di klenku. Nos tin ya kaba dos mashin instalá i a hasi algun prueba siman pasá, ku a duna bon resultado pa por kontinuá ku e proyekto. Ta trata di 2 mashin outomátiko ku por traha un kantidat enorme di klenku na diferente modèl. No ménos ku 10 modèl di klenku ta bai produsí, esta tantu esun rektangular tradishonal, komo 9 otro diseño.” “Un di e mashin nan por produsí durante un dia di trabou alrededor di 30.500 pida klenku. Aparte di esaki, e otro mashin tin un kapasidat pa por traha 50 mil pida pa dia,” Angelo a konta Extra. El a sigui bisa: ”Awor tur kos ta asina leu ku simplemente mester warda un grupo di persona bini for di Hulanda, pa tira bista riba e fasilidat unda ta bai traha e klenku i kon ta prosesá e klenkunan te na momentu ku nan ta kla pa por usa. Tambe nan ta bai hasi un tèst di laboratorio pa asina e klenku ku nos produsí ta sertifiká pa bon kalidat. Pues no ta simplemente ta bai traha un klenku, sino esaki ta rekerí un proseso pa e ta di kalidat haltu.”
