KRALENDIJK –
E siman aki J.C. Herrera a introdusí ‘Blade’ na Boneiru. Esaki ta un sistema nobo di serbes Heineken kon ta bai atendé ku e serbes den un forma mas efisiente. Tur hende konosé e serbes aki den bòter, sinembargo pa un temporada kaba, ku eksepshon di Boneiru, ta hasi uso di ‘Blade’. Un representante di Heineken, Michael, a duna splikashon e atardi na Islander unda tin algun di e instalashonnan di ‘Blade’. El a menshoná ku pa medio di ‘Blade’ awor e serbes Heineken no tin Co2 mas den dje. Esaki solamente pa medio di ‘Blade’. E serbes den bòter ta keda riba merkado, loke si por tuma nota di dje, ku e ta ménos den sirkulashon kompará ku ántes. Awor hopi negoshi spesialmente ta hasi mas uso di ‘Blade’. ‘Blade’ ta konsistí di un tanki ku ta poko mas chikitu ku un kaha di serbes Heineken i ta saka algu mas ku 30 glas di serbes ekivalente na e bòter kustumbrá. Esaki ta hasi mas fásil tambe na sierto momentu ku ta difísil pa haña Co2 na Boneiru. Asta por menshoná ku kalidat di e serbes awor ta mas duradero momentu ku e no tin Co2 den dje, loke den e bòter si ta kontené. Djis un ehèmpel, na Kòrsou ya ta notabel ku ta usa ménos bòter di Heineken. Esaki ta pone tambe ku ménos bòter ta bai tirá riba kaya pasobra awor e sistema di ‘Blade’ ta kontinuá den uso. Foto ta ilustrá parti di e presentashon introdukshon Heineken pa medio di ‘Blade’.
