KRALENDIJK –

Resientemente Sharina Clarinda a kumpli 30 aña den servisio di JICN, konosí komo prison. E fecha aki no a pasa sin un selebrashon, unda kolega i famia a sinta den bon harmonia i selebrá huntu ku e hubilario. Esaki a tuma lugá na Restorant Fogon. Clarinda a konta Extra ku 30 aña pasá el a drenta den servisio komo wardadó di presu komo e úniko dama i promé na Boneiru den e servisio. ‘E tempu aya mi mes tabata atendé ku presu tantu hòmber i muhé i no tabatin sekshon spesial pa e ser femenino. Tambe mi a bai Kòrsou unda mi a sigui diferente kurso, basá riba e funshon komo wardadó di presu. Tambe mi a traha 6 luna na prison na Kòrsou. Despues di 7 aña ku mi tabata laborá na Boneiru, a bin mas hende muhé den e funshon. Awendia tin diferente hende muhé ta traha i kos ta hopi mas mihó organisá, kompará ku 30 aña pasá’, Clarinda a konta. E selebrashon e anochi a bai ku un tremendo bufèt i a kòrta bolo pa e okashon. Riba potrèt Clarinda i famia i konosí, tambe huntu ku hefe di trabou i algun di e koleganan ku por tabata presente pa e okashon.