KRALENDIJK—
E fakansiplan di e sentro pa hubentut ku ta Jeugdhuis Jong Bonaire, e asina yamá “Summer Camp”, ta sigui ta unu eksitoso den su di tres i penúltimo siman di e fakansiplan. Den kombersashon ku nos tabatin ku e kordinadó sr. William Evertsz pa Jeugdhuis Jong Bonaire, e la duna di konosé ku e fakansiplan ta kanando bon i ta sigui unu sumamente eksitoso. E “Summer Camp” ta den su fase final ya ku e ta den su di tres siman i otro siman ta e último siman di e kampamentu. Otro siman ta e siman di bai mondi unda e hóbennan ta siña kon pa sobreviví. Nan lo siña kon pa prepará nan mes kumindá den mondi pa sobreviví. Esaki huntu ku diferente otronan mas ku nan lo siña den e último siman di e kampamentu. E siman aki e hóbennan a siña tambe kon pa kushiná i tambe prepará kosnan pa pasaboka etc etc. Den un palabra por bisa ku na momentu ku e “Summer Camp” finalisá otro siman, e hóbennan a siña hopi fo’i djesaki. Esei ta tambe e meta di e “Summer Camp”, no solamente pa e hóbennan pasa bon, gosa etc., pero pa nan siña tambe fo’i djesaki. Por ehèmpel e último siman di e kampamentu lo bira unu bastante interesante kaminda nan lo siña kon pa sobreviví dado kaso nan haña nan mes den un situashon pa esaki. Momentu ku e kuater simannan di e kampamentu ta tras di lomba, e hóbennan banda di a gosa i disfrutá hopi, a siña hopi tambe fo’i djesaki. Ainda tin oportunidat pa inskribí pa e último siman di e kampamentu pagando solamente $15,- pa henter e siman ku kuminda kayente tur mèrdia durante e siman. Pasa na Jeugdhuis Jong Bonaire i inskribí e yu(nan) pa e último siman di e kampamentu otro siman.
