KRALENDIJK – Resientemente Swinda Statia a habri un tienda ku produkto ku e mes ta krea ku diferente kos. Nòmber di e negoshi ta Xiany’s Creation & Art. A inisiá e parti ofisial ku un orashon di pastor Oliveira Jr. Tambe a dirigí palabra propietario di e negoshi, Swinda Statia. El a menshoná entre otro ku loke tin den e tienda ta kos ku e mes a traha. E ta yama Dios danki awe e tin su mes negoshi. Hende mester lucha hopi pa logra loke nan ke. Statia a gradisí su kasá, kende a sosten’é i yud’é pe a logra loke tur hende ta mira aki. E ta gradisí su rumannan, Franklyn i Aitel, kende tabata e motor tras di e proyekto ku awe a mira lus di dia. El a danki tambe na su yunan ku a yud’é durante preparashon di e tienda. Tambe el a gradisí Dios pa e union di su rumannan ku e tin i tur momentu nan ta kla pa yud’e. Statia a finalisá gradisí Oshe, kende a yud’é sin ku e tabata na altura di e proyekto. Seguidamente a papia pastor Oliveira Jr. huntu ku dos otro pastor, kende tabata huntu kuné, esta pastor Roberth i Yhon. Pastor a bisa ku e hende mester ta ku Dios, semper tene na Dios pa e habri porta pa nos. Si un porta sera un mas grandi kuné lo habri. E bendishon di Dios ya den nos. Loke Statia a haña, ta algu ku Dios a manda pe. E tin bon kasá i semper e ta sosten’é. Despues a pasa pa kòrtamentu di sinta di e negoshi. E lugá ta habrí pa pueblo di Boneiru. Statia ta invitá tur hende pasa i mira loke tin pa ofresé. E tienda ta situá na Kaminda Lagun 23 i por yama tambe 717-2456 pa mas informashon.
