KRALENDIJK —

Un kaso di abusu i inhustisia grandi kometé di parti gobièrnu di Boneiru, a yega na konosementu di e programa di televishon hulandes KASSA, ku resientemente a manda su reportero Amber e isla aki pa atendé problemanan ku ta toka e konsumidó boneriano. Siudadanonan boneriano a hasi bon uso di e oportunidat aki. Entre otro Elsio Beukenboom i su famia, ku a denunsiá un situashon di abusu i inhustisia ku nan a haña nan mes embolbí aden.

Loke ta pasa ta ku Elsio Beukenboom i su esposa a bai biba na nan kunuku situá pa nort di e dam Mona Pasashi, pabou di e kunuku Santa Clara. E dos personanan aki, ku ta hende di edat avansá kaba, tabata biba den tur trankilidat na nan kunuku. Manera presentadó di e programa, Amber, ta bisa, nan kier a pasa e último añanan di nan bida na nan kunuku, pero kosnan a bai otro.

Loke a sosodé ta ku gobièrnu a kambia e destinashon di e área ei i a pèrmití pa kompanianan ku ta produsí material di konstrukshon, manera stenslag i santu, pone nan krùshernan na Santa Clara. Di mes operashon di e mashinnan aki ta produsí hopi stòf i na sierto momentu famia Beukenboom no por a soportá mas i mester a bai for di nan kunuku.

Belbus di KASSA a kombersá ku tantu Elsio Beukenboom, su esposa i komo nan nietu, ku ta esun ku a denunsiá e kaso aki na e programa di televishon. “Kasi 10 aña kaba e pareha hende grandi aki ta bibando den un hòki, siendo ku nan tabatin nan propio kas na kunuku, na unda nan tabata biba felis i dushi. Te na momentu ku gobièrnu a pèrmití pa destiná un tereno grandi pariba di nan kas komo área industrial”, presentadó di e programa ta splika. E famia ta splika kon nan tabata biba felis, lanta mainta wak nan kabritunan, skucha paranan kanta, disfrutá di dushi aire. Awor esaki no por mas. Ta den un kasita den kurá di kas di nan nietu nan mester biba. Nan a ekspresá duele pa e forma kon nan kunuku a para kaba, debí na e desishon di gobièrnu, ku a kambia destinashon di e teritorio ei, sin tene kuenta ku tabatin hende bibá ei banda. E krùshernan na Santa Clara ta produsí hopi stòf, hasiendo bida di e pareha Beukenboom insoportabel. E esposa di Elsio a splika kon te awe e loke a pasa ku nan ta traha riba su esposo, ku ta lanta den anochi i papia tokante e bida dushi ku nan tabatin na kunuku.

Famia Beukenboom a trata na yega na 2008 na un kambio di tereno ku gobièrnu, di manera ku nan por a bai forma nan bibá na otro lugá den área residensial. A yega asta na un akuerdo na 2014, pero nunka esaki a sosodé. “Nunka nan no a bin puntra nos nada. Gewon nan a hasi e tereno un zona industrial i laga pone krùsher. Nos no por sinta pafó, komo ku tin yen di stòf. Ta yen di karta nos a manda pa gobièrnu sin haña reakshon”, e señora di Elsio a bisa. El a splika tambe ku por a sinti ku e ámtenarnan ku kende nan tabata atendiendo e asuntu aki tabata manda señal ku lo mester paga nan pa regla un ke otro. El a bisa nan esaki tambe, pero nan a nenga ku nan a bini pa sèn.

Mesora e presentadó di KASSA a referí na e echo ku Rijksrecherche a investigá kasonan di korupshon den e aparato gubernamental di Boneiru. Presentadó di e programa despues di basta esfuerso, yama i yama, a logra haña un sita ku e direktor di DRO, Etienne van der Horst, kende a splika ku e kaso aki ta promé ku su tempu. El a aña dí ku si e tabata den e posishon ku e ta okupá awor, e lo a atendé kaso aki otro. El a primintí ku ta bai atendé e situashon di famia Beukenboom den tempu rápido awor. “Si boso bini aki kuater luna boso lo ripará ku tur kos lo ta reglá.”