Homenahe na promé kampion ABC

KRALENDIJK—

Djadumingu último den oranan di atardi den Patio di Ofisina Prinsipal di gobernashon di nos isla den sentro di siudat, Identidat Públiko Boneiru, a rindi homenahe na e promé kampionnan di Kopa ABC di futbòl, di kua e final a tuma lugá aki na Boneiru ku Real Rincon ganando di e kampionnan di Jong Holland di Kòrsou. E parti ofisial di e atardi a inisiá ku palabranan di MC pa e okashon aki, sr. Robert Sances, ku a yama bonbiní na s.v. Real Rincon i su dirigentenan, fanatikada i otro invitadonan pa e okashon aki, tambe prensa.

Despues a sigui e diferente diskursonan di e mandatarionan, diputado sr. Edsel Cecilia, diputado Kroon i Promé Mandatario Gezaghebber sr. Edison Rijna. Despues a inisiá ku e rekonosementu na e kampionnan di s.v. Real Rincon, unda ku tantu Gezaghebber komo e diputadonan, a entregá “pin” di gobièrnu di Boneiru na e miembronan di s.v. Real Rincon. Na e okashon aki tambe, sr. Ruby Balentien, un di e fundadónan di s.v. Real Rincon, a hasi entrega di un eskudo di s.v. Real Rincon na Gezaghebber sr. Edison Rijna.

Por último a hasi entrega di e rekonosementu ofisial di Gobièrnu di Boneiru, ku ta un bunita plakat na e kapitan di s.v. Real Rincon sr. Buchi Frans i su presidente, sr. Carluco Pourier. Despues a sigui e diferente diskursonan di entre otro e spònser di s.v. Real Rincon, Jan Hendrik, presidente sr. Carluco Pourier i presidente di FFB, sr. Ludwig “Luti” Balentin. Despues di e partinan ofisial a sigui bríndis i selebrashon di e atardi di rekonosementu na s.v. Real Rincon.

Riba potrètnan esenanan di e atardi menshoná den Patio Ofisina Prinsipal di Gobernashon di nos isla den sentro di siudat.

SHARE


LEAVE A REPLY

Please enter your comment!
Please enter your name here