KRALENDIJK —
Sentro pa Hubentut i Famia (SHIF), djaluna último a revelá e promé buki pa mucha ‘E promé palabranan’. Durante e parti ofisial a dirigí palabra Chris Palm di SHIF, Addo Stuur presidente di Stichting Lezen & Schrijven, Henriette Hooijkaas i Representante di Reino Jan Helmond. Seguidamente a pasa pa e parti di entrega di buki, unda Dynn Coster di 18 luna a risibí e promé buki for di man di Mimi Dongen. Entre otro esnan ku a dirigí palabra a menshoná kon importante lesamentu ta i ta trata di un buki 4 idioma. Esaki ta e 4 idiomanan mas usá na Boneiru ku e meta pa mas hende posibel por hasi uso di e buki. E buki ta trata 3 temporada di tempu di kresementu di un beibi. Tambe a menshoná ku por haña e buki den Media Bùs. E buki ta grátis. Si tin persona ku ta deseá mas buki tambe tin posibilidat pa kumpra. Kontenido di e buki ta trata di kosnan konosí den komunidat di Boneiru, entre otro buriku, kabritu i muchu mas. E idea ta pa kuminsá ku lesamentu di buki for di chikitu ku e muchanan, pa asina nan drenta e mundu di lesamentu, loke ta hopi importante pa na desaroyo. Tambe ta kompartí e buki ku Saba i Sint Eustatius.
