Boneiru premiá ku ‘Readers Choice Awards’

KRALENDIJK —

Durante show di DEMA na Las Vegas, Boneiru a keda premiá dor di representantenan di Scuba Diving Magazine kaminda Boneiru a risibí un plakat di ‘Scuba Diving Magazine’s Readers Choice award’ pa 2019. Boneiru a sigurá un total di 7 premio na Las Vegas, konsistiendo di 2 premio na promé lugá titulá mihó Shore Diving pa di 26 aña konsekutivo i tambe mihó Macro Diving.

Banda di esaki Boneiru a risibí 1 premio na di dos lugá pa Beginner Diving, 1 premio na di tres lugá pa Advanced Diving i tambe vários premio na di 4 lugá pa Best Overall Dive Destination, Underwater photography i Best Value. Ganando e premionan aki ta demostrá ku e produkto di sambuyá di Boneiru ta úniko i tin hopi potensial.

Boneiru ta konosí komo Divers Paradise i sambuyamentu ta keda un di nos produktonan prinsipal den turismo. E premionan aki ta keda presentá den plataformanan digital i tambe den database di Scuba Diving Magazine, kual tin un alkanse grandi rònt mundu, ta palabranan di Malinda Hassell, manager di merkadeo di Tourism Corporation Bonaire.

Ademas Tourism Corporation Bonaire a kuminsá evaluá ku operadornan di sambuyá i partnernan kon por mehorá e produkto di sambuyá na Boneiru. Nos ta analisando nos produkto aktual dor di trata puntonan manera kiko Boneiru ta ofresé, kiko otro destinashonnan di sambuyá ta ofresé i nos refnan i ambiente marino.

Hopi isla den Karibe a kuminsá ta mas agresivo den promoshon di nan isla komo un destino pa sambuyá, nos tin ku tene esaki na kuenta ya komo esaki por tin impakto riba nos merkado di sambuyamentu.

Pa 2019 nos ta studiando kon pa aktualisá Boneiru su produkto di sambuyá, esaki huntu ku tur nos partnernan i operadornan di sambuyá, Hassel a bisa.

SHARE


LEAVE A REPLY

Please enter your comment!
Please enter your name here