David Martinus ganadó apsoluto di 48hfp

KRALENDIJK –

David Martinus di nBoneiru a kompetí den e reto di ’48 Hour Film Project’ i a logra bira ganadó apsoluto. Diferente grupo di Boneiru, Kòrsou, Aruba i Statia a partisipá den reto aki. ” Pa ami e logro aki ta un stap mas serka den e direkshon ku ami ke bai ku mi bida”, David Martinus a deklará despues na Extra.

Den 48 ora mester skirbi, filma, editá i entregá un pelíkula di no ménos ku 4 minüt i no mas di 7 minüt. Kada grupo a risibí un género, un personahe, un opheto i un frase ku nan mester inkluí den nan pelíkula. Pa aña 2018 e elementonan obligatorio ta e personahe Alex of Alexa, un renchi i e frase ‘dikon un kara serio asina?’ (Why so serious).

Drama

E género di e tim di David Martinus tabata drama. Den e pelíkula aki a ilustrá e bataya kontra depreshon di un pareha despues ku nan a pèrdè nan yu. Den un kòmbersashon ku David, el a ekspresá su gratitut pa e logra bira ganadó apsoluto. “Nos a yega di kompetí mas bia i awe ta e di tres bes ku nos a gana.

E kompetensia tabata fuerte i pa mi ta honesto i bisa ku mi mes tabata hopi nèrvioso. E pelíkula aki tabata hopi spesial, pasobra e ta ilustrá algu ku ta pasa mas i mas den nos sosiedat, pero hende no sa papia di dje.” Ampliando riba e tema David Martinus a bisa ku depreshon ta algu ku meresé atenshon.

Den e pelíkula aki su meta tabata pa ilustrá kon un hende por kai den un spiral, distansiá su mes for di esnan mas serka di dje i kai den un skuridat mental i emoshonal.

Filmapalooza 2019

David ta sonreí: “Na final… esei boso mes lo tin ku wak. Mi tin sigur ku na Filmapalooza 2019 nos lo ta un kompetensia fuerte. Mi ta hopi gradisidu na mi tim. Mi ta atmirá Nathania, ku a karga e pelíkula ku un aktuashon ekstraordinario.

Mi ke inspirá mas hóben pa nan tambe sigui nan soño. Pa ami e logro aki ta un stap mas serka den e direkshon ku ami ke bai ku mi bida.” E nòmber ‘By a Thread’ tabata un desishon di henter e tim.

E ta aksentuá kon tin biaha un hende su bida por ta na rant di destrukshon; manera ta na un hilu nan ta kologá. Ku e pelíkula ‘By a Thread’ e tim di BYOF Media lo representá Boneiru kontra tur otro siudat mundial na Filmapalooza 2019.

SHARE


LEAVE A REPLY

Please enter your comment!
Please enter your name here