Giomar Janga ganadó kompetensia di ortografia

KRALENDIJK —

Giomar Janga a resultá ganadó di e di sinku kompetensia di ortografia di Fundashon Lesa ta dushi (FLTD) i yùfrou Jeanne Goeloe ganadó di kompetensia huki di buki mas atraktivo den klas. Djabièrnè 16 novèmber a tuma lugá e di sinku kompetensia di ortografia na Hulandes ku (FLTD) ta organisá pa muchanan di 12 te ku 14 aña. E kompetensia a tuma lugá na Liseo Boneriano.

Diputado Edsel Cecilia a hasi apertura di e kompetensia despues di a hiba tremendo palabranan pa enkurashá pa tantu e kandidatonan komo e organisashon di FLTD. Seis kandidato a partisipá na e kompetensia importante aki ku e fundashon ta organisá pa motivá e grupo aki tambe pa lesa.

Tur kandidato tabata bon prepará dor di maestronan di ‘Pienter voor taal’. Huradonan tabata Lucretia Leming, dosente Hulandes na VMBO, Tariq Römer, dosente Hulandes na MBO i Vivian Wensink, dosente di ‘Taalpraktijk: Leren is doen’. Maestro di seremonia, ku por sierto a hasi un tremendo trabou, tabata Kaitlyn van Arneman, alumno di Liseo Boneriano.

E kompetensia tabatin tres ròndu i tur seis kandidato a hiba un tremendo bataya. Dos kandidata a bai final i tabata Giomar Janga ku finalmente a gana e kompetensia. Por bisa ku e kandidatonan tabata bon prepará i a hiba un bataya fuerte.

E anochi aki a hasi entrega tambe di premio pa e kompetensia di ‘Huki di buki mas atraktivo den klas’. Yùfrou Jeanne Goeloe di Kolegio Strea Briante tabata e ganadó ku a drecha un bunita huki di buki den su klas pa motivá su alumnonan pa lesa.

FLTD ta gradisí famia Bol di Hulanda pa nan aporte finansiero ku a hasi e kompetensia posibel. Tambe palabranan di gratitut na e organisashon di ‘Pienter voor taal’, tur partisipante i direktiva di SGB, pa uso di lokalidat na Liseo Boneriano.

Tambe ta gradisí tur mayor ku a bin apoyá nan yu durante e presentashon. FLTD ta sigui ku su lucha pa konsientisá tantu nos muchanan komo mayornan ku lesamentu ta hopi importante pa desaroyo di nos muchanan di Boneiru.

SHARE


LEAVE A REPLY

Please enter your comment!
Please enter your name here