Di eskurshonista pa turista

Turismo di kasino

Meskos ku Boneiru su turismo tabata krese, e problemanan tambe tabata presentá den kaminda. Un dje problemanan, ku a bini anteriormente kaba dilanti, tabata esun di gruponan ku Hotel Bonaire tabata trese for di Merka pa hunga plaka den kasino. E tipo di turistanan aki no tabatin un balor agregá grandi na turismo boneriano.

Asta e tabata influensiá turismo negativamente. E tipo di turistanan aki apénas tabata sali for di hotèl. Gobièrnu, segun por dedusí for di korespondensia e tempu ei ku gerensia di Hotel Bonaire, tabata pone hopi preshon riba operador di e hotèl pa kambia e maneho aki. Bou di e preshon aki gerensia di Hotel Bonaire ta primintí gobièrnu ku e lo bai trata pa den koperashon ku Club International kuminsá trese otro tipo di turista e hotèl.

Club International tabata konta ku 340.000 miembro, ku tabata organisá biahenan di grupo pa Kòrsou i Aruba, den koperashon ku KLM i ALM, for di Merka. E idea di Hotel Bonaire tabata pa trese e miembronan di Club International ku avionnan DC-8 di KLM for di New York, pa despues nan sigui pa Boneiru ku e avionnan CV-240 di ALM.

Na 1967 Hotel Bonaire tabatin 25 buelo ku gruponan for di New York, bulando ku KLM pa Kòrsou i despues ku ALM pa Boneiru. Ademas e hotèlnan tabatin dos buelo charter direktamente for di New Orleans di hendenan ku a bin spesialmente pa hunga plaka den kasino di e aña ei.

Konekshon

Un problema grandi tabata e konekshon di e buelonan di KLM for di Merka di Kòrsou pa Boneiru. E turistanan mester a sinta warda hopi promé ku nan por a yega e isla aki, loke nan no tabata gusta. Despues di hopi aña di lucha Boneiru a logra haña na 1967 finalmente buelonan direkto di ALM for di Aruba, hasiendo posibel pa trese turistanan ku yega ku kompanianan di aviashon merikano Boneiru.

Tabata trata di dos buelo semanal. Originalmente e buelonan aki tabata di tal forma hinká den otro ku nan tabata sali djaluna for di Aruba pa Boneiru i djabièrnè un buelo for di Boneiru pa Aruba. Esaki tabata stroba e turistanan pa por ehèmpel pasa wikènt na Boneiru. Despues sinembargo ALM a kambia e skema aki i a laga e buelo bini djabièrnè direktamente for di Aruba i djadumingu regresá Aruba, atrobe den forma direkto.

E buelonan direkto di ALM for di Caracas pa Boneiru tambe tabata satisfaktorio pa gobièrnu. Si ALM tabata kontentu ku e konekshon aki ta un otro pregunta. Gobièrnu di Boneiru, den su intentonan pa haña kompanianan di aviashon stranhero pa bini e isla aki, tabata topa kada bes ku e problema ku mester a drecha e pista di aterisahe pa por risibí avionnan tipo djèt.

Na 1967 a kuminsá finalmente e preparashonnan pa alargá e pista i traha un terminal i plataforma nobo. Gobièrnu Sentral a duna e kompania NACO N.V. enkargo pa traha un pre-konsepto pa e proyekto aki. Un desaroyo importante na 1967 tabata e echo ku Hotel Bonaire a kambia di doño.

Mas bien ta asina ku Grupo Nash a kumpra e akshonnan di Grupo Miller i asina nan a bira e doño kompletu di e hotèl. Grupo Nash tabatin plannan grandi pa algun tempu kaba. Nan ke a traha 40 kamber adishonal, pero nan no a hasi esaki. Na lugá di kumpli ku su promesa, Grupo Nash i Miller a krea un debe formal te asta ku na fin di 1967 tabatin menasa serio ku e hotèl lo a bai fayit.

ABC Promotion

No opstante ku tabatin basta kompetensia den turismo entre Aruba, Kòrsou i Boneiru, tòg por ripará ku e tres islanan aki a yega na un forma pa hasi promoshon huntu den eksterior. Promé ku esei ya kaba e diputadonan di turismo di e tres islanan tabata reuní regularmente, pero na 1967 a ofisialisá esaki bou dje nòmber di ‘ABC Promotion Stichting’. Meta di e fundashon aki tabata pa hasi promoshon den forma kombiná i kordiná na benefisio di e islanan aki.

E statuto di e fundashon tabata bisa tekstualmente: “Het doel van de Stichting is het gecombineerd en gecoördineerd optreden ten behoeve van de Benedenwindse Eilanden ten aanzien van de bevordering van het toerisme en alles wat daarmede verband houdt in de ruimste zin van het woord”.

E presidensia di ABC Promotion tabata kambia tur aña i kada aña e gezaghebber di un di e teritorionan insular tabata sinta komo presidente. E diputadonan di turismo tabata keda miembro pa dos aña, miéntras un dje hefenan di Ofisina di Turismo, kada bes pa un aña, tabata fungí komo atministrador dia 21 di òktober e fundashon a tene su promé reunion na Boneiru. Mester apuntá ku den e segundo mitar di añanan sesenta Gobièrnu di Boneiru ta bin haña un partner importante i fuerte den sektor di turismo.

Ta trata aki di Hugo Gerharts, ku a kuminsá ta tuma rienda di e kompanianan ku su tata, L.D. Gerharts, a lanta. Hopi di e kompanianan di Gerharts tabatin di aber ku turismo. Por ehèmpel desde yanüari 1953, pa medio di un dekreto di Bestuurscollege fechá 1953, no. 66, pues ku forsa retroaktivo, a enkargá Handelmij Bonaire N.V. ku supervishon di aeropuerto, konosí mas tantu bou dje nòmber di Fèlt.

Esaki tabata enserá ku Handelmij Bonaire mester a duna servisio na tur avion, tambe sierto servisionan públiko. Medardo Thielman tabata enkargá ku e trabounan aki. El a bira parti di e aeropuerto ei.

SHARE


LEAVE A REPLY

Please enter your comment!
Please enter your name here