Fo’i Vila Maria Goretti

Nos ta yegando fin di aña i esaki ta e último entrega di ‘Fo’i Maria Goretti’ pa e aña aki. Dentro di algu mas ku un siman nos ta den un aña nobo. Aña 2019! Ta di bai spera kiko e aña ei lo bai trese. Tambe ta okashon pa tira un bista bèk riba e aña ku ta yamando ayó.

Den e aña aki atrobe m’a trata na kumpli ku e responsabilidat pa publiká e página aki. Mi gusta skirbi i p’esei skirbimentu di e rúbrika aki no ta masha difísil. Problema sí ta e falta di tempu pa hasi tur loke mi mester hasi i ke hasi. Anto esei a pone ku den e aña aki na un par di okashon mi mester a keda sin publiká ‘Fo’i Vila Maria Goretti’. Mi ta spera ku boso ta pordoná mi.

***

Djis pa refreská, e rúbrika ‘Fo’i Vila Maria Goretti’ ta kontinuashon di e página ‘Fo’i Mariadal Resort’, ku m’a kuminsá skirbi na fin di sèptèmber aña pasá, tempu ku mi a hospedá 18 dia den e instituto di kuido aki. Despues ku m’a sali mi a kontinuá den e mesun forma, pero kambiando e parti di Mariadal pa ‘Vila Maria Goretti’, ku ta mi kas, mi bohio. Pakiko Maria Goretti?

Pasobra den e kas aki tabatin na fin di dékada sinkuenta pa kuminsamentu di añanan sesenta di un asina yamá ‘bewaarschool’ pa mucha chikitu, operá pa sùrnan di Roosendaal. Te ainda mi tin e imágen di Maria Goretti ku tabatin den e skol aki. Su kondishon físiko sinembargo ta laga hopi di deseá. Mi kier a laga hasi sirugia plástiko na su kurpa.

Algun aña pasá un konosido artista plástiko a kuminsá ku operashon na kurpa di Maria, pero e trabou a para na mitar. E aña m’a pidi un oferta pa restorá Maria Goretti, pero e ta resultá muchu karu di loke mi por afòrt pa paga. Kisas mi por organisá un ‘fundraising’, un kaminata òf algu, pa salba Maria Goretti.

***

Kedando na Maria Goretti, den e promé mitar di e aña aki Chon Theodora a tuma inisiativa pa tene un enkuentro ku e promé alumnonan di Maria Goretti Bewaarschool. E ‘muchanan’ aki, awor bayendo direkshon di setenta aña, a reuní den mi kurá di kas pa kombersá i rekordá nan tempu na e skol aki. Chon a hasi dos programa Herensia ku e ‘muchanan’, di kua e tambe a forma parti.

Spesialmente pa yuda forma dekòr pa e grabashon aki m’a saka Maria Goretti pone den kurá. Normalmente mi tabatin Maria paden, den un tipo di veranda será di Vila Maria Goretti. Desde e dia ei el a keda pafó, spantando hopi hende ku a blas riba dje. Mi mes a spanta na vários okashon.

Mi ta spera pues ku lo mi por haña un tiki plaka èkstra pa pasa Maria den un operashon di sirugia plástiko, promé ku e deteriorá di tal forma ku un ehersisio asina no tin sentido mas. Ban spera kiko ta bai pasa e aña benidero.

***

Un di e preokupashonnan di mas grandi ku mi tin ta kiko ta bai hasi ku tur e manuskritonan ku mi tin den lachi, kasi kla pa publiká buki. Diferente di nan ta prosedente di serinan ku m’a publiká den Extra e último añanan. Nan tur ta kompilá den failnan di PDF i Word, wardando riba publikashon den buki.

Mi por menshoná aki manuskritonan di historia di Antriol, historia di sklabitut, historia di Nort di Saliña revisá i ekspandé, San Juan/San Pedro, Maskarada, historia di aviashon, manuskrito tokante spiritu, historia di enseñansa na Boneiru, historia di religion i asina posigui menshoná. E siman aki m’a disidí di hasi un último intento pa yega na publikashon via Denise de Jongh-Rekwest.

Si e no ta bai, mi ta laga e manuskritonan drumi trankil den kashi numa. Asina simpel e kos ta. Mi no ta bai kansa mi kabes mas. Pa mi tin basta.

***

Loke sí lo mi sigui hasi ta di skirbi serinan históriko i kultural den Extra. Un di nan ku lo kuminsá den febrüari ta un seri tokante piskamentu, mirá tantu den perspektiva históriko komo den un perspektiva mas aktual, esta e parti di piskamentu sostenibel. E parti aki lo bai huntu ku WNF, e fondo mundial di naturalesa. E seri den Extra lo bai kompañá tambe ku programanan kòrtiku di televishon.

Pa esaki nos a entrevistá masoménos 8 persona kaba tokante piskamentu. Ta trata di un proyekto ambisioso, pero nos ta bai p’e. Mi tin un grupo di hende prepará pa hasi e parti di produkshonnan pa televishon.

***

Mi ke bai hasi tambe e aña benidero un último intento pa prepará hende pa skirbi. Por ehèmpel mi ta mira espasio pa skirbi un buki diki di historia di farándula na Boneiru. No ta un tópiko ku ta interesá mi, pero mi sa sí na unda tur informashon ta. Ta djis mester di hende pa pone nan skouder bou di algu asina.

Komo modelo pa un proyekto asina por sirbi e bukinan di Japi Martijn. P’esei tambe m’a saka nan fo’i rèki e siman aki pa tira bista den nan. Mi ke pidi, asta roga, esnan ku ta seriamente interesá pa skirbi un buki asina (kisas mas ku un tomo) pa tuma kontakto ku mi.

Lo mi informá i guia boso kon pa hasié, ademas mustra kiko FuHiKuBo mes tin kaba na dokumento i korantnan bieu den kua nos a pone atenshon na farándula. Mi telefòn 7866818.

***

No ta resta mi nada otro ku di despedí di boso pa e aña aki, sperando ku nos lo bolbe topa otro aña. Felis Pasku i tur kos bon den 2019.

***

 

SHARE


LEAVE A REPLY

Please enter your comment!
Please enter your name here