Prizon nunka ta 100% hermétikamente será

KRALENDIJK –

No tin muchu dia ku e prison nobo na Plantashi Aruba a bira operashonal ku ya e detektá ilegalidat den e instituto. E notisia ku mas a hala atenshon ta esun kaminda a haña telefon selular den sèl di George Jamalodin, kende ta será na JICN pendiente tratamentu di su kaso. Aparte di e telefon aki, durante kontròl a logra topa ku mas ilegalidat.

Mesora ta surgi e pregunta, kon por ta posibel ku ilegalidat por yega den un instituto penitensiario moderno asina kon ta konta ku máksimo siguridat manera a menshoná na su apertura resientemente. Extra a aserká Wibo de Vries, direktor di JICN, pa un reakshon. De Vires: ‘Purba hinka kontrabanda den e instituto ta un problema di tur tempu entre detenido i personal.

Trahadónan di JICN konosé hopi prosedura di siguridat tantu di e edifisio, komo detenidonan i personal. Ta sigui e proseduranan aki di forma hopi estrikto. Kontinuamente tin atenshon pa siguridat i kòntròl di siguridat. Banda di esei, tin kontròl èkstra, tambe pa personal, pa mantené e instituto mas sigur posibel. Apesar di tur e esfuersonan aki, un prison nunka ta 100% hermétikamente será pa mundu pafó.

Ora diskubrí kasonan di kontrabanda ku a drenta JICN, ta investigá i analisá kada insidente te den detaye i ta tuma medidanan nesesario. Di e forma aki JICN ta keda skèrpi riba e estilonan nobo ku ta krea pa purba di hinka kontrabanda den e instituto, de Vries a duna di konosé.

SHARE


LEAVE A REPLY

Please enter your comment!
Please enter your name here