KRALENDIJK —
Fundashon nos ke Boneiru bèk (NKBB) resientemente tabata na islanan ruman Kòrsou i Aruba riba un mishon di informashon i konsientisashon i en buska di sosten i solidaridat i tambe fondo pa kontribuí den e lucha i trayekto pa pone Boneiru bèk riba lista di teritorionan sin propio gobernashon di Nashonnan Uní. Tantu na Kòrsou i Aruba a hiba kòmbersashonnan fruktífero ku vários lider di influensia i tambe organisashonnan polítiko i síviko sivil ku a mustra nan preokupashon pa e situashon alarmante di Boneiru despues di e kambionan estatal di 10-10-10.
Na ámbos isla loke ta basta remarkabel ta ku te awe ainda mayoria di suidadano di tur dos isla ta bou di impreshon ku ta e pueblo di Boneiru mes a skohe i ke loke nos ta sufriendo i pasando den awor. Apesar di esaki, tòg nan a sa di demonstrá hermandat i kompashon i ku nan ta solidario ku e pueblo Boneriano i ku nan lo kontinuá pa vigilá di aserka e desaroyonan i tambe den futuro duna un man sigur kaminda nan por.
Na Kòrsou, NKBB ku Movementu Kousa Promé enkabesá pa Rene Rosalia, a logra konkretisá e akuerdo di koperashon ku a inisiá na desèmber último ku e meta pa uni forsa i sigui traha huntu den Caribbean Progressive Alliance (CPA). CPA, aliansa fundá pa James Finies, presidente di NKBB na Sint Maarten na mart 2017. Simultáneamente e organisashonnan Brighter Path Foundation i Progresive Labor Party di Sint Eustatius i Independance Sint Maarten Foundation di Sint Maarten, a djòin e aliansa.
Awe, Aruba, Boneiru, Kòrsou, Sint Eustatius, Sint Maarten, Archipelago San Andres, Providensia, Santa Catalina, U.S. Virgin Islands, Puerto Rico i Grenada, awor ta miembro. E ophetivo prinsipal di CPA ta pa sostené i koperá den e lucha pa outodeterminashon di e islanan.
Ta ophetivo similar ku Kousa Promé ke realisá pa Kòrsou ta pa sostené i koperá pa terminá e sinku leinan di konsenso i pa respetá e vishon i espíritu di e karta di Nashonnan Uní di e mesun manera ku ta respetá e tratado di Lisboa konserniendo Union Oropeo i pa implementá e karta di Nashonnan Uní pa outodeterminashon di e pueblonan. Na Aruba, NKBB a logra e mesun éksito pa amplia e frente di koperashon Antia i Karibense ku e organisashonnan Grupo 7, enkabesá pa Rocky Kelly i Plataforma Status Territorium, enkabesá pa Orlando Croes.
E metanan ku e organisashonnan aki ke logra pa Aruba ta pa sostené i koperá ku otro pa evaluá i si ta posibel ofresé e diskushon riba e posibel kambio den konstitushon di Aruba pa reforsá nos leinan konstitushonal den Reino, sostené i koperá pa demanda trato igual di Hulanda pa ku Aruba komo partner igual den Reino, sostené i koperá ku pueblonan Karibense den nan lucha pa outodeterminashon i lucha kontra kolonialismo i tur sorto di deskriminashon den Reino Hulandes.
NKBB ta mira bèk riba un mishon hopi eksitoso na islanan ruman Aruba i Kòrsou i ta hopi orguyoso ku e frente di koperashon entre e islanan, Caribbean Progressive Alliance, ta ekspandiendo i ta saliendo na interes di tur e pueblonan di nos islanan.
