KRALENDIJK –
Boneiru a selebrá un bunita kar-naval djadumingu. Gruponan ku trahenan bunita akabá yená ku ambiente, a forma e bunitesa di Boneiru su karnaval ku indudablemente ta sigui krese. E parada di karnaval a sali na tempu for di dilanti di Van den Tweel.
Na inisio tabatin sierto kosnan ku no a kana bon i tabatin buraku basta grandi den e parada. Trùknan di músika ku a yega lat na salida mester a drenta mas meimei durante e parada. Te ainda nos na Boneiru no konosé ta tene nos mes na ora.
E parada a pasa Kaya Nikiboko Sùit, lora na rotònde subi Kaya Betico Croes, Bulevar Julio Abraham, Kaya Libertador Simon Bolivar, un pida di Kaya L.D. Gerharts, lora na rotònde dilanti Misa San Bernardo subi Kaya Nikiboko Sùit i bai terminá na dilanti Van den Tweel.
Henter e ruta tabata yen di hende pa gosa di e karnaval. Aki aya tabatin sierto problema chikitu ku Polis mester a atendé kuné, pero en general tur kos a kana na òrdu. Boneiru un biaha mas a demostrá ku e por tin su bunita karnaval i no mester bai ningun kaminda.
Tumba
Loke si ta remarkabel ku e tumba ganadó no a zona mes durante e parada di karnaval. Mayoria grupo, pa no bisa tur, a baila riba tur otro ritmo ku eksepshon di tumba. Esaki ta pone nos yega na e konklushon ki sentido tin pa tene Festival di Tumba siendo gruponan no ta toka e tumba ganadó.
Di otro banda no por eksigí e gruponan tampoko pa toka tumba pasobra ta nan ta paga e banda òf DJ i ta nan ta disidí ki tipo di ritmo nan ta baila riba dje. E organisadónan di karnaval, den e kaso aki KLAVE, si nan ta sigui organisá karnaval, mester bai den nan seno i evaluá profundo si realmente tin sentido pa sigui tene Festival di Tumba.
