KRALENDIJK –
Hilda Martis, un señora konosí den bario Nikiboko, a selebrá su di 85 aña di bida djarason último meimei di su famia, amigu i besiñanan den Kaya Sinfona. Pastor di parokia San Bernardo a tene un servisio religioso, despues di kua e invitadonan a keda un ratu ameno huntu ku otro pa selebrá.
Hilda a nase den Nikiboko fo’i famia Martis, ku tin relashon estrecho ku Antriol. Spesialmente hendenan di e parti sùit di Antriol den pasado, via Hanchi Amboina, tabata komuniká hopi ku Nikiboko.
Entre otro pa kue awa na Pos di Amor i otro posnan den e área ei, manera tambe Pos di Kaweta. E parti ei di Nikiboko ta konosí pa su posnan. Hilda den pasado tabata un persona hopi aktivo riba trahamentu di obranan di artesania. El a yega di tene tambe eksposishon di su obranan na kas.
