KRALENDIJK –
Djabièrnè mainta a duna inisio na e fin di siman di trabounan boluntario, BonDoet, organisá pa Plataforma di NGO Boneiru, den kooperashon ku Oranje Fonds. Ta trata di e di 10 edishon di e aktividat di boluntario anual na Boneiru.
Pa e aña akí, un kantidat di 1.600 boluntario a registrá pa duna un man i yuda boluntariamente pa yuda fundashon-, sosiedat òf institutonan di kuido. E apertura ofishal a tuma lugá e aña akí dilanti di ofisina di EXTRA/FUHIKUBO.
Lianne Domacassé, na nòmber di Plataforma di NGO Boneiru, a repasá brevemente historia di Bondoet, ku e ta yama un logro hopi grandi. Boneiru ta pionero riba e tereno akí den nos region. Segun Domacassé na Boneiru tin hopi organisashon ku ta drai riba boluntario.
E nesesidat na boluntario ta grandi na Boneiru. NGO Platform, despues di a tuma nota di e aktividat di NLDOET na Hulanda, organisá pa Oranje Fonds, na 2009 a buska kontakto ku e organisashon pa por organisá un aktividat asina na Boneiru tambe.
Na 2011 e promé Bondoet a tuma lugá na Boneiru, ku partisipashon di 700 boluntario. Boneiru tabata pionero riba e tereno akí, pero pronto e flam a pasa pa e otro islanan tambe i awendia tin CURADOET, ARUBADOET, SABADOET, SINTEUSTATIUSDOET i SINTMAARTENDOET.
E aña akí sinembargo NLDOET a keda kanselá pa motibu di e pandemia di Coronavirus. FUHIKUBO tambe ta un di e organisashonnan ku ta risibí kooperashon di boluntarionan e aña akí.
Rudy Domacassé na nòmber di direktiva di FUHIKUBO, na okashon di apertura di e fin di siman di BONDOET a bisa ku e organisashon akí tambe ta drai riba boluntarionan. E organisashon ta embolbí entre otro ku trahamentu di dokumental riba diferente tereno, ta hasi investigashon i ta tene charla i organisá tayernan etc.
E tin un biblioteka i dos wèpsait ku enorme dokumentashon, esta Archivo Boneiru i BonaireTV. E fin di siman akí 10 boluntario lo yuda den e bibiloteka di FUHIKUBO pa registrá i organisá e mas òf ménos 1.800 bukinan ku tin ku haña nan lugá.
Interesante ta, segun Domacassé, ku den den archivonan di FUHIKO tin hopi informashon tokante trabou boluntario na Boneiru, ku por yuda pa hasi estudio di trabou boluntario na Boneiru.
