KRALENDIJK –

Na Boneiru a hisa na un nivel mas haltu e medidanan di prekoushon pa evitá ku coronavírùs ta yega òf plama. Entrante ayera, ku entrada inmediato, tur skol na Boneiru, fasilidat deportivo, iglesia etc. ta sera te un próksimo aviso.

Pa establesimentunan di horeka, manera restorant, ta na vigor ku no por tin mas di 50 persona na mes momentu den un establesimentu, inkluso personal. Tambe a drenta na vigor un prohibishon pa aglomerashon di mas ku 50 persona.

Tambe a dekretá aeropuerto di Boneiru komo zona protehá. Esaki ta algun di e medidanan ku Gezaghebber di Boneiru i e Tim di Maneho Insular a anunsiá durante un konferensia di prensa ayera tardi den Sala di Reunion di Konseho Insular den edifisio Pasangran.

Ta medidanan tambe ku ta forma parti di e ordenansa di emergensia ku Gezaghebber a anunsiá ayera i ku entretantu a keda publiká tambe. Ta pidi empresanan pa keda kouteloso i tuma medidanan pa evitá ku e malesa COVID-19 ta plama bou di e personal.

P’esei e atvertensia pa tene otro na distansia, social distancing, ta keda esensial. Pa loke ta turistanan ku yega for di áreanan di riesgo, esakinan lo bai den karentena obligatorio. Pa loke ta trata dunamentu di informashon a habri un sentro di yamada, un asina yamá call center, kaminda un i tur por yama pa haña informashon.

E number di e sentro di yamada akí ta 0800-1351. E yamada ta grátis. Gezaghebber a bolbe enfatisá ku ta medidanan pisá, ku e meta pa prevení ku nos ta haña nos mes ku situashonnan manera ta e kaso na Hulanda i otro partinan di Karibe Hulandes.

Tambe el a spierta pa ta alerta pa notisianan falsu ku ta sirkulá riba retnan sosial i pa hasi uso di informashon di fuentenan ofishal, manera wèpsaitnan di OLB i RCN i tambe página di Facebook di e entidatnan akí.