KRALENDIJK –

Coronavírùs i e malesa ‘COVID-19’ tin mundu henter den su gara. Mundu a kambia kompleto i e malesa kasi a paralisá tur kontakto entre sernan humano. Tin diferente boneriano ku ta biba den eksterior na e momentunan, tambe na paisnan hopi afektá pa e malesa. Kon nan ta eksperensiá i dil ku e momentunan difísil akí?

Esther Goti-Felix, ta un ‘Much’i Antriol’, ku ta biba ku su kasá i dos yunan na Italia. Aya e ta biba na Quercianella, un pueblo chikitu ku ta forma parti di munisipio di Livorno den e region di Toscana. For di 1975 Esther ta biba na Italia, pero kasi tur aña e ta bin bishitá su famia na Boneiru.

Italia ta despues di China e pais mas afektá pa e malesa COVID-19. Pa algun tempu kaba coronavírus tin Italia kompletamente den su gara. For di djabièrnè último a muri mas di 800 hende na Italia komo konsekuensia di coronavírùs.

Esei tabata e kantidat mas grandi riba un solo dia desde e brote di e vírùs den e pais ei. E kantidat di kaso di morto na Italia ta hopi haltu, kompará ku e kantidat di infekshonnan ku a ofisialmente a mèldu.

E motibu eksakto di esaki no ta muchu kla. Ekspertonan ta asumí ku tin diferente motibu. Italia por ehèmpel un di e poblashon di mas bieu na mundu i mayoria morto ta grandinan ku ya tin nan malesanan eksistente. Na Italia hopi wela i tawela ta biba ku nan yu i nietunan den kas.

Pa e motibu ei nan por keda infektá fásil. Mas aleu ta sospechá ku e kantidat di hendenan infektá ta konsiderablemente mas haltu ku nan ta mèldu i hopi ta kaso ta leve i ta bai sin síntoma, i no ta keda registrá.

Situashon hopi fèrfelu

Esther ta relatá e momentunan difísil ku Italia i su habitantenan ta konfrontando na e momentunan akí. Ounke ku e no ta biba den e region ku ta mas afektá di Italia, esta e parti Norte di e pais, tòg e ta basta preokupá ku e situashon.

“E situashon ta hopi fèrfelu”, Esther Felix ta konta EXTRA den un kombersashon via Whatsapp. E bida sosial ta kompletamente paralisá pa tur habitante di Italia, esei kier men den su pueblo Quercianella tambe.

Tur hende ta preokupá, pero no por hasi nada. Ta di sinta warda kiko ta bai sosodé. Loke ta tin Esther hopi preokupá ta ku no ta hende di edat haltu so ta muri ni personanan ku tin un kondishon di salú debil.

Eshter: “Ounke ku ta bisa ku coronavírùs ta mas peligroso pa personanan di edat haltu ku tin un kondishon di salú debil, tòg ta resultá awor ku tin hendenan yòn tambe ta muri. Awe mes un ingeniero di 51 aña di edat a muri. Anto e persona aki tabata un hende bon di salu.

Esei ta nifiká ku tin hende yòn tambe ta muri. No ta un persona ku tabatin patalogia”, Esther ta bisa. E situashon ta hopi serio, e ta bisa. Rònt Italia 14 dòkter a muri kaba i tin riba 2500 dòkter i enfermero malu.

Separashon familiar

E malesa a kambia bida diario di e habitantenan kompletamente. Apénas tin bida sosial. Kasi no tin kontakto ku bisiñanan, si no ta ora sali un ratu den kurá i hisa man kumindá otro for di distansia. Mas tristu ta ku e malesa a kibra bida familiar kompleto.

Tin hende ku nan mama òf tata a muri, ku no por a bai serka nan pa ni despedí di nan. E separashon familiar ei ta kai Esther, ku ta mama i Monica i Enrico i tambe wela, hopi duru. E ta haña falta di su nietonan.

Normal e ta biba un tiki serka nan i un tiki na Quercianella. Awor sinembargo e ta mará na kas i no por biaha pa bai serka nan. “Danki Dios ku awendia tin medionan di komunikashon, manera Skype, ku nos por keda den kontakto ku otro.

E ta un kos dramátiko”, Esther Goti-Felix ta bisa. Dos siman pasá tabata último bia ku su yu muhé Monica i nieta tabata di bishita serka dje. Danki Dios nan por a regresá nan kas djis promé ku henter e bida a paralisá na Italia.

Segun Esther e situashon ku ta reina na Italia ta pone ku hopi hende ta kai den depreshon. Niun hende no ta sinti nan mes trankil na e momentunan akí. Tur hende ta biba ku miedu i ta trata di sigui loke nan ta bisa bo pa hasi.

“Asina por ehèmpel ora mi kasá bai hasi kompra e ta bisti hanskun di plèstik i asina yega kas ta kit’é benta den ko’i sushi pafó di kas. Tambe ta kita sapatu promé ku drenta kas.” Gobièrnu di Italia entretantu a tuma medidanan drástiko pa frena plamamentu di e malesa. Esther ta kompletamente di akuerdo ku e medidanan ku gobièrnu ta tuma.

I e medidanan ta bira dia pa dia mas severo. Tin muchu hende kabes duru, segun Esther. Esei no ta konta solamente pa hóbennan. Tin hopi hende grandi tambe ku no ta tene nan mes na e reglanan. Hopi di e hendenan ku polis ta topa riba kaya ta personanan riba 85 aña.

Boneiru

Esther ta sigui e desaroyonan di e malesa na Boneiru hopi di aserka. E tin hopi gana di bin keiru. Esei tabata su plan tambe, si e malesa no plama. Ya e tabata na punto di kumpra su pasashi, pero mester a deshasí di e idea akí.

Regularmente e tin kontakto su rumannan na Boneiru, partikularmente ku su ruman muhé Soraida i tambe e ta sigui diariamente loke ku ta pone riba Facebook. E ta spera ku pronto e situashon por normalisá di manera ku e por bishitá Boneiru atrobe manera e tin kustumber di hasi tur aña.