Ubaldo Anthony, kende no ta un persona deskonosí den mundu kultural boneriano, no ta sinta ketu e dianan aki ku ta rekomendá hende pa keda kas, relashoná ku coronavírùs. E ta moviendo, entre otro ku trabou boluntario di fotografia pa Fundashon Históriko Boneriano – FuHiKuBo.
Tokante e foto aki el a bisa: “Di tantu rekomendashon pa keda kas, mi a usa parti di mi tempu pa krea un otro obra. Mi a skohe no pa un obra apstrakto e biaha aki, pero mi a keda den e mundu di ‘realismo den fotografia’.
Un paisahe ku hopi di nos ku ta biba aki na Boneiru ta mir’é kasi tur dia, pasobra e ta kantu di kaminda, ora nos ta bai of bini for di aeropuerto. E tempu será den kas mi a us’é pa duna un plachi rektángulo plat (potrèt) un toke spesial. Mi a skohe pa e efekto di un globo oval, kreando profundidat den e imágen.” Riba página 6 di e edishon aki tin mas informashon i obra di Ubaldo Anthony.
