KRALENDIJK –
E aña aki en konekshon ku ‘Dia di Rincon’ a planta un ban`- dera di Rincon riba e seru Koumati, situá den área di Onima. E inisiativa aki a nase serka algun miembro di Grupo Chantiwawa, un grupo di masoménos 15 persona ku ta kana tur djadumingu mainta rutanan un tiki difísil den naturalesa boneriano.
Ta un grupo di eksplorashon, pues no djis pa kana. Algun siman pasá e grupo a kana na dos okashon den área di Onima. Na e promé okashon a bai dirigí pa subi Koumati, e seru ku struktura asina spesial, ku barankanan grandi rondó di dje.
Bòi Antoin, lider Chantiwawa, a hiba e grupo na e úniko akseso ku tin pa subi Koumati. E mes den pasado a yega di subi e seru aki, pero awor no tabatin kurashi mas. Un subida ku no ta fásil. 5 Miembro di e grupo sí a subi, entre otro Gregory Hooi i Maideline.
Huntu ku otro personanan ku a subi e seri nan a disidí pa bai bèk despues pa planta un bandera. Gregory a hasi e trabou tékniko. Posada Para Mira a spònser e inisiativa. Djaweps último for di mainta tempran bandera di Rincon a bula riba Koumati. Parse ku ta promé biaha esaki a sosodé.
