KRALENDIJK –

Ku tur rèspèt a pidi un grupo di dama ku tabata den van Den Tweel Supermarket, si por a intervení den nan kombersashon. Nan tabata sinta kombersá hopi ameno i alegre. Mester por. Bida ta bunita kreá pa nos disfrutá di dje.

Ta trata di Scarlet Ellis, Vanessa Wanga konosí pa ‘Pèk’, Esmeralda ‘Esmee’ Huerta i un ruman di ‘Pèk’. Por a komprondé di nan ku ‘Pèk’ konosé Scarlet mas di 40 aña, i nan ta sinti nan mes manera ruman.

“Mi amiga ruman Scarlet a serami ku ‘Esmee’ i ya pa algun aña nos tin un bon amistat. Awor mi ruman Jacinta Dolores Wanga a bini Boneiru, e amistat a bira algu mas fantástiko, pasobra e ta amiga pa hopi aña di ‘Esmee’, for di promé ku e la establesé na Boneiru.

Di e forma aki nos ta huntu gosando di bida. E plan ta pa kontinuá na e sitio aktual ku regularidat,”Pèk a bisa. Tin e impreshon ku ‘Pèk’ ta ‘PR’ di e grupo, e forma ku el a konta. Debí na tempu e reportero no por a kompaña nan un momentu pa tende e tópiko di e dia. A ofresé nan pa saka nan un potrèt di e grupo, loke nan a bai di akuerdo.