E foto maestral aki di Pieter Smit ta mustra un gabilan piskadó ku a kaba di sigurá su kuminda. Gabilan di laman òf gabilan piskadó tin un largura di 53 cm. E ta un para grandi komedó di piská, mirá regularmente na tur parti di e isla kant’i laman kaminda por haña piska.
E ta bula riba laman i saliña òf bo ta hañ’é sintá riba palu i barankanan kantu di e kaminda di turista. Su parti ariba ta skur i parti abou ta blanku ku un pida pretu na e punta di e alanan.
Su kabes ta blanku ku un strepi pretu ku ta hala atenshon komo ku e ta kore pasa duars di e wowo, su rabu ta strepiá. E ta keda kologá den laira promé ku e laga su kurpa kai den laman pa e kue su kuminda ku su patanan. (Foto: Pieter Smit)
