KRALENDIJK—
Habitante i outomobilistanan di Bario Republiek desgustá ku e situashon di kaminda. Ta trata di Kaya Jasinto i Kaya Amatissia i bisendario, no por papia di buraku den kaminda, sino kanal òf roi ku tin debí na áwaseru ku a pèrkurá pe.
Algun luna pasa a remarka tokante e situashon i esnan konserní ta na altura kon e kaminda ta den e área menshoná. Simplemente no ta duna e atenshon ku ta duradero. Na diferente okashon ta laga yena greis riba e kaminda i loader ta skaf drech’é.
E ta keda bon, sinembargo ta kuestion di algun dia. Áwaseru solamente mester kai un bia pa e dañá tur trabou ku a hasi pa drech’é a kaminda. Esaki ta sosodé debí ku ta trata di kayanan ku ta den barika di seru di bario republiek.
Pues momentu áwaseru kai, e awa ta kore for di ariba bai abou ku e tera i laga kanal òf roi den e kaminda. No falta masha pa un outo baha den e roi i no por sali. Kualke outo ku no ta haltu no por pasa den e área ariba menshoná.
Outomobilistanan ta pidi pa esnan konserní, tuma otro desishon kon drecha e kaminda. Yen’é ku tera no ta un solushon. Simplemente ta pèrdèmentu di tempu i sèn. E kamindanan ta rekerí sea asfalt òf klenku pa e por dura pa largu tempu i ta stabil. Kombinashon di potrèt ta ilustrá parti di e kaya aya na Bario Republiek.
