E aña 2020 aki tabata e aña mas pió ku nos a eksperensiá sigur den 100 aña, debí na e pandemia di Covid-19, ku a kuminsá biba serka nos bou dje nòmber Corona vírùs. Desde 13 di mart ku nos a kuminsá sinti efektonan di Covid-19 pa awor hopi kos a pasa.
Nos di Bonaire Communication Services N.V. tambe a sinti e efektonan, pero nos a sobrebibí, debí na akshonnan ku nos a tuma rápido. I e desishon mas importante tabata pa kuminsá ku BONERIANO komo un korant diario.
Mester bisa ku BONERIANO no tabata e promé korant diario na Boneiru. Promé ku nos Zamir Ayubi a kuminsá ku e korant BONEIRU AWE, ku sinembargo despues di un par di siman a disparsé. Nunka mas no a bini un korant diario imprimí riba papel.
BONERIANO a eksistí kaba e último añanan komo suplemento grátis di Extra na momentu ku tabatin hopi notisia i aviso. E nòmber BONERIANO tabata mi eskoho personal, sin konsultá ku niun hende. Mi por ta bon kabesura tin biaha.
E nòmber a pega. Mi soño semper tabata pa Boneiru tabatin su mes korant. M’a pensa di pidi Rogelio Montero, mi amigu na Aruba, pa traha un diseño ku e logo di Extra den banda.
Mi deseo i plan tabata pa usa e kabes di BONERIANO tur dia pa e edishon boneriano di Extra. Pero un persona den Extra no tabata ke esaki. Pero Covid-19 a pone ku tòg BONERIANO a bini, promé ku 12 página, awor ku 16 página tur dia, tin bes asta 20 página.
Boneiru tin awe su mes korant, imprimí pa Drukkerij De Stad na Kòrsou, pasobra na Boneiru mes no tin un prensa rotativo, manera nan ta yama e forma di imprenta aki. Kuminsá ku BONERIANO tabata un reto. Bon mirá no tabatin otro opshon.
Debí na Covid-19 a bira difísil pa imprimí un Extra ku edishon boneriano. Nos mester a pensa den direkshon di nos mes korant i el a logra. Ainda nos tin reto nos dilanti. Esun mas grandi ta transporte aéreo entre Kòrsou i Boneiru.
Ku e korant BONERIANO ‘on- line’ no tin ningun problema. For di mainta tempran e abonado ta haña akseso na BONERIANO digital. Nos a logra, pero mester sigui. Mi deseo ta pa BONERIANO e aña benidero move sin mi, di manera ku mi por konsentrá mas riba Fundashon Históriko Kultural Boneriano. Bon Pasku, felis 2021!
