Aña 2020
Manera tur hende sa, for di den aña 2019 a kuminsá papia di un vírus ku ta asotando China etc., sin por a pensa ku e lo a yega banda di nos tambe. Tur hende den ekspektativa pa aña 2020, pa kolmo ta ‘schrikkeljaar’.
Ami no ta gusta traha plan, debí na eksperensia ku semper ora mi planea algu e ta frakasá, pero no planeá ta sali tremendo. Pero asina mes mi a disidí ku e aña aki mi ta kumpli 65 aña di bida, di bai pas’é na Hulanda serka mi nietu stimá, mi konosínan i mi ruman.
Ya nos a hinka un selebrashon di un siman largu den otro. Ta kuminsá na Groningen, despues Arnhem i ta terminá na Rotterdam. Bunita; tur kos ta kla, tíket ta kumprá pa warda djabièrnè 13 di mart pa por abordá KLM pa un luna i ora regresá ta baha man un poko na trabou.
Solamente ora tin kos pa atendé personal ta bai ofisina. Danny mi yu, mi ‘baby-boy’, a hinka den mi kabes mas tantu pa bai Hulanda, el a kumpra su tiket dia bieu. Mi ta sinti ku tin algu na yegada djasabra 14 di mart na Schiphol.
Anyway, preparashonnan a kuminsá i den fin di febrüari ami a kumpra tíket. Djadumingu 8 mart informashon nan a kuminsá drenta ku e vírus ta na Hulanda i m’a bisa ku mi no ta bai mas. Nuera ku yunan ta bisa mi ku ta ko’i kèns, ku e vírus no ta banda di nos aki ainda.
Kanselá
Djaluna mainta dia 9 di mart mi a manda KLM un mail pa avisá ku mi ta kanselá mi buelo. Djamars nan ta yama mi fo’i Hulanda bisa mi: “Shirl bo tin rason, mihó no bin.” Hahaha, tíket ta kanselá un dia kaba. Danny sí a bisa ku e ta bai, anke su tata a keda papia kuné pa e por saka e asuntu di biaha ei for di kabes.
No ku djabièrnè 13 mart, un ora promé di check-in’ e ta yama mi pa kanselá su buelo tambe. Un poko kobarde, o mihó bisá tímido, hahaha.. Asina e tambe a kanselá……. A selebrá 65 den kompania di mi trahadónan i famia masha trankil.
Asina e dia – luna- nan a sigui. Un aña ku a trese hopi kos kuné, pero ta gradisí Dios pa tur bendishon risibí. Kuminsá na mi kas, mi yunan, nietu, mama, rumannan, koleganan i amistatnan.
Duru
Momentunan duru ku pèrdida di sernan keri hopi yegá, manera Tante Vita, Soeramina Martines-Pourier, Dr. Hermelijn, mi bon amigu stimá Julius Andrew, Anneke,un señora hulandes oropeo ku mi a konosé apénas 2 siman via Alda Dirksz.
Nos a kombersá /app komo sifuera nos tabata konosé otro añanan kaba. Serando e korant di Pasku aki, e últimonan ta Mayra Josefa, un persona ku a konfrontá hopi lucha i vèrdrit den su bida.
Tambe Eric Meye aya na Cartagena-Colombia, ku mi a lanta den Playa Pariba konosé su famia i ta komèr di su ruman Willy. Tambe na Aruba un gran persona, Frido Croes, ku mi a konosé ku su señora Lourdes den grupo Kawara 60+. Di kurason mi ta deseá famianan tur kos bon, hopi forsa pa pasa e último dianan di aña 2020.
Kambio
COVID-19 a trese hopi kambio riba tur tereno. Ta un atvertensia di nos Dios pa nos para ketu, stima nos rumannan mas i mas, stòp ku envidia. Ban pone man na obra, no kere ku ta sèn, kosnan material ta na promé lugá.
Biba segun bo forsa. Si bo tin Dios den bo bida, bo tin tur kos i lo bo ta felis. Mi a ripará ku ta ora bo ta pasa den kosnan fastioso di bida, bo ta tene mas duru na Dios i Su brasanan ta habrí pa nos tur. Kòrda kuida bo mes pa por protehá otro. Un felis Pasku i Próspero Aña Nobo!
