KRALENDIJK —
Herbertson Bernabela, mihó konosí komo Herbi, ta un persona ku ta hasi dekorashon pa kompania, famia i pa diferente okashon. BONERIANO a entrevista Herbi pa e edishon di Pasku aki, komo ku el a dòrna basta pal’i Pasku e aña aki.
Herbi tin su propio kompania di dekorashon ku ta DIVINE DECORATION. Herbi tin 26 aña di edat. Den e artíkulo aki e ta konta tokante dekorashon den e temporada di desèmber aki.
Dòrna Pasku
Herbi ta konta: “Dòrna pa temporada di Pasku a nase masha simpel. Mi tabata dekorá pal’i Pasku na kas pa mi famia, mi mama i tantanan. Pa motibu ku mi tabata publiká algun di mi dekorashonnan di pal’i Pasku riba media sosial, algun persona a keda enkantá ku e dekorashonnan aki i asina nan tabata aserká mi pa dekorá pal’i Pasku pa ofisina lugá òf kompanianan.”
Herbi tin algun kompania ku e tin algun aña ta dòrna pa nan kaba manera Tempo Bonaire, Juwelenhuisje, Baranka di Restorashon i KPCN. Herbi ta konta: “Mi tin 2 aña ta dekorando pa Tempo Bonaire, Juwelenhuisje tambe ta 2 aña kaba.
Esaki ta mi di 3 aña ta dekorá pa KPCN i di 4 aña ta dekorando pa Baranka di Restorashon. Mas ku klaro mi ta dekorá pa kas di famia, mi amiganan i konosínan. Loke tambe mi ta hasi den e dushi temporada aki ta dekorá pa eventonan manera sena di Pasku di kompania i tambe pa un sena mas familiar.”
“Mi kier a yama mi dushi hendenan danki pe oportunidat i konfiansa pa pèrmití mi drenta nan kas i hasi e temporada aki aun mas speshal ku mi dekorashon. Aña 2020 no tabata fásil, pero nos ta hasi lo mehor i ku amor.”
