Grupo Chantiwawa no ta djis kana pa kana. E grupo aki ta eksplorá mondi, naturalesa, ademas ta krea ruta nobo. Nos tin un persona, Gregory Hooi, ku ta eksperto den habri mondi. E tin henter un ekipo, for di machete, skèr chikitu, skèr grandi te na zag.
Nos ta krea ruta den un forma responsabel, pues sin kita nada di mas. Despues ku nos tin un ruta ku nos a kana nos ta dun’é un nòmber, ku por ta referí na e área, un anterior plantashi òf kunuku, un seru òf tambe un suseso ku a sosodé durante nos kaminata riba e ruta. Algun ruta ku nos tin: Ruta Seru Grandi, Ruta Nene Shòrs (George), Ruta Sabal, Ruta Pos di Wayaká, Do’ La- man, Lugá Alehá, Ruta Waikano, Koumati, Ruta Morèkè etc.
Ruta Soila
Pero nos tin un ruta hopi spesial ku yama Ruta Soila, ku ta referí na Solia Amelia, kende a fayesé un par di tempu pasá. El a kana e ruta aki huntu ku mi den un grupo. E tabata asina fasiná ku e naturalesa aki. El a rekordá su tempu di infansia na Tra’i Montaña.
El a kome i disfrutá di stanibari, koubati. E kier a sigui kana, pero no masha despues el a fayesé. Komo honor na Soila nos di Grupo Chantiwawa a yama e ruta aki ‘Ruta Soila’. Un bunita ruta. Idea ta pa nos pone un bòrchi pronto na kuminsamentu di e ruta aki.
Ruta Janchi
E siman aki m’a tuma e desishon a-demokrátiko, sin konsultá ku demas miembro di Chantiwawa, pa krea un ruta na honor póstumo di mi tata Cornelis Cipriano Antoin, alias Janchi, oriundo di Kunuku Bieu.
E ta keda den un parti di ser’i Montaña ku m’a kana hopi kuné. Mi tata su kunuku tabata na Gurubú, pegá ku loke nan tabata yama ‘Kabe’i Montaña. For di su kunuku e tabata bai ku mi riba e seru aki pa bai kontrolá su kabritunan.
Nos tabata bai te na e sitio na unda awendia den e krus, unda tin kaminda di asfalt. E tempu ei no tabatin kaminda ainda riba e seru aki. E kaminda via di kibrá di Montaña a keda kla na 1963/64. Komo mucha di seis pa shete aña, na man di mi tata, m’a konosé ei riba sin asfalt. Boso por imaginá?
Naturalesa
Mi promé enkuentro ku nos mondinan, ku nos frutanan di mondi tabata huntu ku mi tata Janchi (1898-1992). E tabata tene mi man pa bai riba ser’i Montaña, tambe yamá Seru Largu, pabou di nos kunuku. Tin biaha e mester a karga mi.
Mi ta eternamente gradisidu pa loke mi a haña di dje na konosementu di nos naturalesa, entre otro di nos frutanan. Grásias na su esfuersonan, su deseo pa traspasá konosementu ku un dia mester yega e generashonnan despues di dje, m’a siña identifiká mata i palunan den naturalesa.
Tambe m’a siña distinguí frutanan ku bo por kome i frutanan prohibí, for di kua bo mester keda leu. M’a siña konosé nos paranan. Algun dia pasá m’a bai ku un miembro di Chantiwawa pa promé nos rekonosé e ruta.
Tabata un momentu un tiki emoshonal pa mi, kòrdando mi tata. Intenshon ta pa djadumingu awor nos bai kuminsá habri e ruta aki. Asina ku e ta kla Grupo Chantiwawa lo bai organisá kaminda riba e ruta aki, durante kua lo mi duna splikashon.
