Algun siman pasá por a tuma nota di un publikashon den nos korant di e hóben Nathanael Zimmerman, unda el a sali huntu ku un maestra di skol i esaki su par di kèts `custom`. Klaro komo media ku ta promové kosnan positivo di nos hóbennan, BONERIANO a bai buska pa sa ken ta Nathanael, mihó konosí komo `Nata skills`
Ken ta Nathanael?
“ Mi nòmber ta Nathanael Zimmerman, mihó konosí komo Nata Skills. Aktualmente mi ta studiante di MBO 3 i ta hasiendo e estudio di `Allaround Vakkracht Onderhoud en Klusbedrijf. Mi a nase na Hulanda, pero despues a bin biba Boneiru.”
Den su oranan liber Nata ta pinta, skucha kantika i kore baiskel. Ku Nata ta gusta pinta ta opvio, mirando loke e ta hasi ku e kètsnan. Nos a pidié konta un tiki mas di e pintamentu kon esaki a kuminsá.
“For di `kleutershool` mi tabata gusta wak kreit. Mi tabata fasiná pa e diferente kolónan. Ku 10 aña mi a bai lès di pinta, pero despues mi a stòp.” Tur esaki a yuda yega kaminda Nata ta awe na loke e ta hasi. Lógikamente nos a bira kurioso pa sa kon henter e diseñamentu di kèts a kuminsá.
Inspirashon
Tur kos a kuminsá na 2015. Wakmentu di vidio i potrèt di artistanan merikano ku tabata pinta riba kèts. “Mi a gusta esaki pasobra mi mes ta gusta bisti kèts. Mi tabata sa mesora ku lo ta algu ku mi lo kier a hasi.
Pero mi a duda den mi mes ku si mi lo logra.” “ Despues di 5 aña mi a bin bèk Boneiru i na e momento ei ma disidí di bini ku e fèrfnan nesesario . Ma bin ku nan, pasobra mi a bisa mi mes pa bai p’e, enbes di balotá loke mi por”.
Nata ta konta ku unabes el a kuminsá ku e arte aki, el a traha su página di `Instagram` i tambe `Facebook. “ Mi sa ku hendenan di Boneiru ta interesá den `custom sneakers` , pues mi a bai p’e.
Si tuma nota riba Nata su páginanan di retnan sosial por tuma nota ku tin diferente koló i diseño . BONERIANO a pidi Nata pa konta di unda su inspirashonnan ta bini. “Inspirashonan ta bin di diferente kaminda.
Por bisa ku mi inspirashon- nan pa diseño ta bini mas tantu dor di naturalesa. Mi a nase na Hulanda, pero ta un honor pa representá Boneiru, pasobra ta aki mi a lanta. Pues nos lo por spera mas diseño ku tema di naturalesa.”
`Custom` i futuro
Ku un hòbi manera esun ku Nata ta práktika, ta haña e impreshon ku den futuro e lo ke hasi algu ku tin di haber ku pintamentu. Sea arkitekto òf algu den e direkshon ei .“E idea ta pa mi tin mi mes negoshi ku diferente stail di kèts, ku por skohe i laga pinta”, Nata a bisa.
Nos tin sigur ku hopi ta esnan ku lo a bira ku- rioso pa sa konta por laga Nata `custom` un kèts. “ E persona ta bini ku su kèts. “Sea nan ta bini ku propio diseño òf mi ta diseñá algu, manera m’ a hasi ku direktora di MBO su kèts. Ta hasi diseño tantu pa hende grandi komo mucha.” Ainda e no ta bende kèts, pero den futuro t’e idea pa e obranan aki ta optenibel pa tantu hende lokal komo tambe turista.
No duda
Anteriormente Nathanael a splika ku den promé instante el a duda den su mes. Nos tin sigur ku hopi hóben lo ta duda na momento di ke hasi algu. Nathanael ta keda bisa, kere den bo mes.
“Kasi tur kos den bida tin ku lucha p’e. Pero si bo kere den bo mes, anto keda lucha, lo bo logr’é, e hóben a finalisá bisando. Por subi riba su página di `Instagram` nata_ skills i riba `Facebook` Nata Skills pa mas potrèt i kualke otro pregunta of informashon.
