ENSEÑANSA TA VULNERABEL

KRALENDIJK—

Durante reunion di Tweede Kamer 14 di aprel último, inspektor general di enseñansa,  Alida Oppers  a entregá e asina yamá  rapòrt `Staat van het Onderwijs` na ministernan di enseñansa siensia i kultura. Den simannan ku a sigui despues di e fecha aki, tur partner riba e tereno enkuestion tin oportunidat di bai den kombersashon ku otro riba desaroyonan den enseñansa. Tur aña  Inspekshon di Enseñansa ta publiká Staat van Onderwijs` i huntu ku esaki ta organisá un kongreso . Debí na situashon aktual di Covid, e enkuentro lo tuma lugá digital e aña aki .

Rapòrt

Entre 14 di aprel i 11 di  mei  tur ku ta embolbí ku e tereno di enseñansa, tin posibilidat pa kombersá i tin interkambio di pensamentu ku otro riba nan área di perspektiva. Intenshon ta pa dia 11 di mei tur hende bini huntu pa wak kon huntu por sigui alsa nivel di enseñansa. Den e rapòrt ta trata entre otro kalidat di enseñansa, retonan, studiantenan ku limitashon, guia pa studiante etc. 

E liña kòrá den e rapòrt di e aña aki ta ku bienestar di e studiante ta bou di preshon. Esaki, segun e rapòrt, ta  manifestá su mes riba diferente tereno. Banda di esaki  universidatnan i skolnan nivel HBO ta prekupá ku mas i  mas studiante ta kai den isolamentu i soledat. Sigur un di e motibunan ku por aklará esaki ta debí na Covid. Tambe ta menshoná ku studiantenan ku tin un òf otro desabilidat ta sinti falta di mas informashon i akseso digital.

Mas uzo di remedi

Rapòrt di e aña aki ta pone mas  atenshon riba uzo di remedi bou di studiantenan. Inspekshon di Enseñansa a yega na e konklushon ku mas i  mas studiante ta hasi uzo di remedi pa por oumentá nan prestashon na skol. Den e rapòrt ta menshoná diferente motibu pa esaki.  

Un ehèmpel ku ta  menshoná ta un akseptashon mas amplio di uzo di remedi bou di studiantenan i tambe un oumento den preshon pa prestashon. E motibunan eksakto di e oumento no por dedusi ahinda for di sifranan ku tin. Banda di oumentu di uzo di remedi pa ADHD(di  0,8 % na 2009/2010  pa 2,9%  den 2018/2019), tin un oumento tambe den uzo di anti depressivo (di 1,5% na 2009/2010 pa 2,2% den 2018/2019).

Hulanda Karibense

Komo parti di Hulanda e rapòrt ta tira lus tambe riba retonan i problemanan ku enseñansa ta enfrente riba islanan BES. Den e kaso aki, un di e puntonan ku  e rapòrt ta menshoná ta  ku kalidat di enseñansa riba e islanan ta  vulnerabel. Motibu pa esaki ta menshoná skarsedat di maestro, spesialmente di enseñansa primario. Skolnan ta vulnerabel pa maestronan ku ta kai afó i pa haña remplaso ta difísil.

Bon guia di parti kabesnan di skol ta un kondishon importante pa por yega na un skol di kalidat. Na momentu ku e kabes di skol bai òf mester bai para dilanti klas, esaki por stagna desaroyo di e skol, segun e rapòrt ta indiká.

Banda di esaki skolnan ta enfrentá retonan grandi riba áreanan sosial. Aki ta hasi menshon di pobresa struktural. Ta menshoná tambe ku idioma ta un problema, komo esaki no ta idioma materno di e muchanan. Implementashon di struktura di kuido na skolnan, loke  EOZ ta ofresé i  sinkronisashon entre EOZ i jeugdzorg, ta puntonan hopi importante ku mester traha riba dje añanan benidero.

Kalidat di enseñansa

Apesar di esaki, e rapòrt ta menshoná kambionan positivo tambe ku a tuma lugá den nos enseñansa. Tabatin adelanto signifikante  durante último 10 añanan . Spesialmente enseñansa primario. 

Kompará ku 2008, por papia di un transformashon den prestashon den tim di enseñansa. Invershonnan den profeshonalisá maestronan i lidernan ta klaramente visibel  den kalidat di enseñansa na skolnan.

SHARE


LEAVE A REPLY

Please enter your comment!
Please enter your name here