AMSTERDAM/ KRALENDIJK —

E periodista hulandes, spesialisá den asuntunan di kriminalidat, Peter R. de Vries, a fayesé ayera den un hospital na Amsterdam, despues di a lucha mas di un siman pa su bida. Djamars siman pasá nan a lòs sinku bala djaserka riba e famoso periodista akí den Lange Leidsedwarsstraat den sentro di Amsterdam.

Esaki a sosodé na momentu ku e tabata kana bai su outo, despues di a partisipá den un programa di televishon. A trata na reanim’é riba kaya i despues a transport’é pa hospital. E atentado i fayesimentu di Peter R. de Vries a shòk no solamente komunidat hulandes. De Vries a muri na edat di 64 aña.

Reakshonnan

“Peter a bringa te na final, pero no por a gana e bataya”, su famianan ta bisa den un deklarashon. “El a murí rondoná di e hendenan ku stim’é.” Peter a biba segun su konvikshon: “Na rudia no ta imposibel pa ta liber”.

Nos ta inmensamente orguyoso di dje i na mes momento inkonsolabel.”Promé Minister demisionario, Mark Rutte, ta bisa ku e ta profundamente konmoví pa morto di Peter R. de Vries. “Ta kasi imposibel pa komprond’é”, e ta skirbi den un promé reakshon riba Twitter.

E hefe máksimo di Ministerio Públiko, Gerrit van der Burg, ta yama e atentado baho i ta bisa ku ministerio públiko lo no sosegá promé ku esnan kulpabel i e mente su tras risibí nan kondena.

Sospechosonan

Polis tin detené dos hòmber detené, ku nan ta sospechá ku direktamente embolbí den tiramentu di De Vries. E persona di kua nan ta sospechá ku ta e a lòs e tirunan riba Peter R. de Vries, ta Delano G. di 21 aña di edat ku ta biba na Rotterdam.

Di dje ta ser bisa ku su fam ta Geerman i ku e lo ta di desendensia rubiano. Famianan yegá di e sospechoso akí lo a bisa e korant hulandes ‘De Telegraaf’, ku G. lo a risibí 150 mil euro pa atentado riba Peter R. de Vries. E otro sospechoso ta Kamil E., un polako di 35 aña, ku ta biba na poblashon di Maurik, Gelderland.

E lo tabata e shofùr di e outo dihuida. Riba e anochi di e atentado un tim di aresto a detené nan den e outo di huida. Nan tur dos ta detené den isolashon. Dia 23 di yüli nan mester presentá dilanti di e ‘raadkamer’ di korte di hustisia. E ora ei lo por prolongá nan detenshon ku maksimal nobenta dia.

Tenas

Komo periodista di kriminalidat, De Vries, a atendé sentenar di kasonan penal, den kua konstantemente e tabata dibulgá asuntunan ku a kambia rumbo di hopi kaso grandi. El a bira konosí tambe pa su grabashonnan skondí ku el a hasi, kaminda Johan van der Sloot ta konta kon e lo a laga e turista Natalee Holloway disparsé na Aruba.

De Vries no a keda na reportahe so. E tabata aktua tambe komo bosero di famianan ku a keda atras i a te asta kuminsá ku un propio ofisina di abogado. E tabata un wéspet fiho den ‘talkshows’ i a bira un personalidat di media, ku tabata komentá sin problema tokante kriminalidat, futbòl i politik. De Vries tabata gosa di un reputashon internashonal.