WILLEMSTAD — Djasabra 30 di sèptèmber entre 10’or di mainta pa 3’or di atardi, Aqualectra tin e promé edishon di ‘Aqualectra den bo bario’ na Maris Stella VSBO, Montaña. Ku e inisiativa akí, Aqualectra su afan ta pa yega mas serka di e kliente pa duna servisio personalisá i eduká riba áreanan di servisio. Alabes tin área di inovashon i área dibertido kaminda por hunga entre otro e weganan eléktriko i di awa di Aqualectra. Pa e promé edishon akí, Aqualectra a uni ku e aktividat kultural ‘Di kunuku nos ta’, organisá dor di Fundashon Museo Ocalia, Unidat di Bario Kòrsou, Sentro di Bario Montaña i Maris Stella VSBO. Durante di e mesun aktividat tin pues ‘Aqualectra den bo bario’, kompañá pa eksposishon di arte, baile kultural, bendementu di kuminda, kos dushi krioyo, kontamentu di historia, animashon kultural i hopi mas. “Esaki ta un momentu úniko kaminda Aqualectra ta bini te den bario, mas serka di e kliente, pa brinda servisio i fasilitá e kliente ku di un manera òf otro no ta logra yega serka nos. Nos ta kuminsá den Montaña pa e promé edishon, pero por spera mas edishon den otro barionan durante e próksimo lunanan”, Ray Seferina miembro di e tim di maneho di Aqualectra, a splika. Durante di e promé edishon di ‘Aqualectra den bo bario’, personanan interesá tin e oportunidat pa risibí informashon balioso serka empleadonan klave di Aqualectra durante 3 workshop informativo. Ta trata di workshop tokante di sparmentu di awa i koriente, resibu di Aqualectra, produkshon i futuro di distribushon di tantu koriente i awa. E aña akí Aqualectra ta selebrando 95 aña di desalinashon di awa na Kòrsou. Durante di e workshop di produkshon i distribushon di awa, ta konmemorá e momentu históriko akí. E workshopnan i servisionan na kliente ta tuma lugá solamente entre 10’or di mainta pa 1’or di mèrdia. Personanan ku tin un òf otro petishon, òf asuntu pendiente serka Aqualectra, por akudí na e evento i risibí yudansa serka e agentenan ku ta duna servisio na kliente.
Alabes Aqualectra tin weganan dibertido ku empleadonan mes a traha pa konsientisá tokante produkshon i suministro di awa i koriente. Tin kompetensia riba e weganan ku chèns pa gana premio. En konekshon ku siman di kultura, Fundashon Museo Ocalia i algun organisashon di Banda Riba, ta pone atenshon na kultura di ántes, awe i di mañan. Ku e evento ‘Di Kunuku nos ta’, ta rekreá i pone atenshon na e diseño di Mangazina di ántes. Tambe ta identifiká artenan di kultura outéntiko atraves di eksposishon di obranan outéntiko di Hipolito Max Ocalia, kende ta konosí pa su obranan ku ta dokumentá partikularmente pasado kultural. E inisiativa ta karga e lema ‘Libertat, igualdat i fraternidat, lasonan fuerte pa un futuro briante.’ Pa mara e totalidat huntu, tin animashon di agrupashon Den Chikí, diferente kuminda i kos dushi di ántes, baile i sekshon dibertido pa tantu mucha i hende grandi. Aqualectra, Fundashon Museo Ocalia, Unidat di Bario Kòrsou, Sentro di Bario Montaña i Maris Stella VSBO, ta invitá komunidat kompletu pa bishitá e promé ‘Aqualectra den bo bario’, edishon kultural den kolaborashon ku ‘Di kunuku nos ta’.
