Brussels / Den Haag- E organisashon polisial oropeo `Europol` a informá ku anualmente ta konfiská alrededor di 4.100 mion euro di krímen organisá, segun e promedio di añanan 2020 i 2021. `Europol` ta indiká den un rapòrt ku ta trata solamente di un kantidat chikitu di e totalidat. Segun estimashon entrada di krímen organisá na Oropa, ta representá ménos ku 2 porshento di e total.
“Krímen organisá a krea un ekonomia paralelo, kriminal i global rònt di labamentu di plaka, transakshon ilegal i práktikanan korumpí”, hefe di `Europol`, Catherine de Bolle, a bisa. Kriminalnan ta hasi uzo debidamente di teknologia moderno pa esaki. Komisario oropeo di relashonnan interno, Ylva Johansson, ta pidi mas koperashon na Oropa pa kombatí krímen organisá.
